Koenders: “No tabatin motibo di intervencion militar contra Venezuela”

DEN HAAG – Marina venezolano no a drenta awa teritorial di Aruba, y no tabatin motibo pa intervencion militar hulandes durante e caso ‘Carvajal’. Asina minister di relacionnan exterior hulandes Bert Koenders a contesta dos parlamentario hulandes awe. E ta trata e.o. riba e articulo ‘casi guera cu Venezuela’ di Antiliaans Dagblad recientemente cu a sugeri cu por poco tabatin guera entre Hulanda y Venezuela.

INTERVENCION

Segun Koenders, no tabatin motibo di intervencion hulandes aña pasa juni den caso Carvajal. “No tabatin indicacion pa tuma accion. Guarda Costa den region di Caribe, y marina ta tene ,-den cuadro di nan trabou rutinario,- e movecion di bapor rond di e islanan, hopi na bista.

MENASA DI VENEZUELA

Pa loke ta e rol cu e supuesto menasa di Venezuela tabatin riba e cambio repentino di pensamento di gobierno hulandes riba e ‘inviolabilidad’ politico di e ‘spion socialista’ Carvajal (pregunta di parlamentario Sjoerdsma y Hachchi), Koenders a bisa atrobe cu ‘no tabatin menasa militar di Venezuela. “Riba investigacion huridico, gobierno hulandes a saca e conclusion cu sr Carvajal Barrios tabata disfruta di inmunidad basa riba tratado internacional di viena. A base di e imunidad ey, sr Carvajal a wordo laga den libertad.

ESTADO DI DERECHO

Segun Koenders, estado di derecho di un pais ta un asunto autonomo di e pais. “Hulanda no tabata envolvi den e detencion di sr Carvajal Barrios” Koenders a sigura e parlamentarionan. Loke a pasa ta cu Venezuela a protesta contra e detencion aki y a indica cu a haci un infraccion riba derecho internacional. A haci investigacion e ora riba e inmunidad di e persona concerni. “Esey a wordo comunica door di gobierno hulandes na gobierno di Aruba” Koenders a sigui bisa. Mes momento a informa na Venezuela, cu sr Carvahal a wordo declara persona non grata. “Aruba a laga Carvajal Barrios den libertad basa riba e conclusion cu e ta goza di inmunidad. Merca a pidi gobierno (di Hulanda) pa clarificacion huridico, y esey a wordo duna y acepta pa Merca”. Lesa e preguntanan aki. NOTA. Foto di archivo di salida d Hugo Carvajal for di Aruba despues cu e la recobra su libertad aña pasa juni.