Polis ta detene joyrider den accion

ORANJESTAD, Aruba – 26 di Augustus 2015: E conocido pa polis R.A. e biaha aki a wordo gara den accion, op heterdaad na momento cu e la joyride un auto nissan tida den color zilver. Na e momento cu esaki a sosode polis a drenta den accion y cuminsa cu persecucion. Gracias na diferente señal di comunidad por a intercepta e sospechoso na altura di Seroe Janchi.

AYO

Na altura di Ayo e conocido pa polis a baha for di auto y a dicidi di drenta mondi . Di inmediato a alerta y intensiva e buskeda. Varios unidad di polis a cuminsa un buskeda rigoroso pa haya e sospechoso aki. Despues di un colaboracion intensivo entre cuerpo policial a bin gara e sospechoso R.A.

TREND POSITIVO

Polis ta riba un "trend" masha positivo di gara malhechornan den fraccion di minuutnan y den algun rato despues di nan acto. Mescos a sosode e ultimo dianan aki. Mester resalta cu e logro aki no ta posibel sin bon suministro di tip pa parti di testigonan.

GRADICIMENTO

Cuerpo Policial ta gradici e bon cooperacion di comunidad. Cooperacion di pueblo ta importante den casonan asina, unda cu Polis ta bay den accion y ta haci detencionnan relampago danki na bon descripcion di e sospechosonan y tipnan valioso di comunidad.