SKOA: Earn Your Future ta haci muchanan mas curioso riba uzo di placa

ORANJESTAD - SKOA ta sumamente contento di por ta forma parti un biaha mas di e proyecto Earn Your Future hunto cu PwC Aruba cu lo cuminsa otro siman den e 6de klasnan di Ciclo Basico. Aquanette Gunn, funcionario di SKOA, mes a participa aña pasa den dos klas di e proyecto piloto y el a bisa di ta haya e relacion pedagogico cu tabatin entre esnan cu a haci e preparacion di e lesnan cu e muchanan, sumamente estrecho. Enberdad ora ta papia di presupuesto mester duna e muchanan cierto terminologia nan riba nan nivel. Pero tambe e combinacion cu tabata haci entre e terminologia nan financiero y e tareanan practico cu e muchanan mester ehecuta, a trece e smaak den e muchanan pa participa den e proyecto.

DOCENTENAN

Tambe di e docentenan di 6de klas SKOA a haya bon feedback riba e proyecto aki. E maestronan a mustra cu despues di e dos encuentronan cu e expertonan financiero, hopi mucha a keda cu hamber pa haya mas informacion riba con pa traha un presupuesto y con pa haci esaki uno balansa y tambe con e gastonan por afecta e entrada. Kiermeen no ta simplemente e dos encuentronan ta pone cu e muchanan ta cla, pero a crea mas interes serca e hobennan riba e topico financiero.

DIRECTIVA DI SCOLNAN

SKOA ta sumamente contento tambe cu e aña aki PwC Aruba a logra cu otro directiva di scolnan tambe por participa den e proyecto aki cu tin un balor adicional pa e muchanan. E edad di e muchanan por ta hoben berdad pero aki poco tempo den e sistema educativo secundario nan lo haya aspectonan financiero tambe como materia y si PwC Aruba por aporta pa duna nan toch un fundeshi, un inicio pa loke ta un presupuesto, e ta sumamente di aplaudi.