De Meza: CITGO lo bishita Aruba pa posiblemente firma MoU

ORANJESTAD –  CITGO lo bishita Aruba dentro di poco pa posiblemente firma Memorandum of Understanding (MoU) dentro di poco. Mientras cu comisionnan ta deliberando riba terminonan pa yega na un MoU cu Citgo, minister di energia Mike de Meza ta sigura cu e interes di Citgo no ta algo nobo. “Citgo a mustra interes den e refineria na Aruba for di algun luna pasa” de Meza ta bisa awe riba su pagina Facebook. “ Nos a cuminsa combersacionnan cu e ehecutivonan na Houston, Texas cu tur e discrecia rekeri y usual den casonan di negociacionnan enorme cu lo por resulta den inversionnan biyonario” e mandatario ta sigura. E mandatario tabata na Houston e siman aki, pa informa e compania mericano/venezolano di e ultimo bishita na Hulanda y a comparti e informacionnan balioso cu nan. Pa loke ta e periodo den cual por spera CITGO, ta premira cu esaki lo ta por ta prome cu fin di september proximo. 

MANDATO DI PARLAMENTO

Segun de Meza ta sigui splica riba su pagina, “ ta cu dos mandato cla di Parlamento, unda cu unanimamente tur tres fraccion a boga pa un reapertura di e refineria pa recobra e porcentahe di nos economia y ingreso den caha di gobierno perdi cu e ciere di e refineria, nos a continua nos dialogo cu CITGO”.

CITGO DI BISHITA NA ARUBA

E mandatario ta papia tambe di su bishita importante na Houston, Texas cu presidente y CEO di CITGO pa informa tocante e ultimo reunionnan y intercambionan cu a tuma luga na Aruba y Hulanda, cu envolvimento di prome Minister Mike Eman, Minister Benny Sevinger y mandatarionan Hulandes, entre otro Prome Minister Mark Rutte y Minister Bert Koenders di Relacionnan di Exterior. E mandatario finalmente ta sigui bisa cu e “ ta premira un bishita di ehecutivonan di CITGO na Aruba y posible firmamento di MoU den e proximo simannan. Como Minister di Energia mi ta cumpliendo cu e encargo di Parlamento di Aruba, e organo di mas halto pa reactiva un pilar economico importante pa pais Aruba” e mandatario ta sigui bisa.