TEDxAruba 2015: Conoce e Startups di e prome Caribbean Beach Hackathon

ORANJESTAD-Na caminda pa TEDxAruba ‘Island of Sustainable Solutions’ a tuma luga diferente di e asina jama ‘Inspiring Sessions’. E sesionnan aki a wordo organisa netamente pa e (young) professionals, studiante y entrepreneur local pa asina informa e inspira nan pa cuminsa y desaroya nan propio Startup. E prome Inspiring Session a enfoca ariba kico ta Startups, kico nan impacto ta ariba e desaroyo di e economia local y global como tambe kico y con nos mes por aporta of participa den e desaroyo aki.

E di dos Inspiring Session a wordo dedica na e prome Beach Hackathon den Caribe, esta un hackathon na Fishermans Huts durante e Love Festival. Señor Arnaud Collery, Chief Happiness Officer di Kikai Mining a facilita e Beach Hacktathon y e thema ariba cual mester a desaroya e producto tawata ‘Happiness’. Happiness y tecnologia por bai man den man ora cu ta visiona un comunidad sostenibel caminda cu e tecnologia ta yuda mehora e calidad di bida di un persona y asta un comunidad completo.

Geeks, nerds, designers, creatives, thinkers and do-ers a wordo invita pa participa den e hackathon aki caminda a ofrece e oportunidad pa brainstorm y desaroya un Startup di concepto te cu ‘final clickable product’ den 48 ora y finalmente pitch e idea aki pa un hurado. Den e caso specifico aki, e huradonan tawata señora Lindsey Wever di CMB, señora Sjeidy Feliciano di ATA y señor Alex Nieuwmeijer di Divi Resorts. E premio pa e participantenan di e grupo ganador, ta un pasashi ida y buelta pa un destinacion cu ta wordo opera pa InselAir Aruba.

Beach Hackathon Startups

A participa un total di 5 grupo y cada un grupo a desaroya un Startup den 48 ora. Despues di e 48 oranan aki, a traslada e gruponan di beach pa Alhambra Ballroom caminda cu nan por a presenta nan ‘clickable product’ mas professional posibel.

‘Ban Yuda’ ta e Ganador

Startup #IamAruba a desaroya ‘Ban Yuda’ cual ta un forma pa e pueblo di Aruba logra bira un comunidad mas uni.

E ta consisti di un website unda cualkier hende por ofrece nan experticio, tempo, of producto. Ora e oferta wordo hasi den e categoria adecuado, cualkier persona por laga un comentario unda nan ta splica dicon a nan ta esun cu mester di e ayuda. E persona cu a traha e oferta ta kies un persona, anto por bai yud'e directamente despues.

Esaki ta un forma facil y lihe pa ofrece ayuda na esunnan cu mester sin mester warda un campana caba, y pa esun ofreciendo ayuda e ta algo cu e por kies ki ora e por duna su tempo. Asina ta hacie mas conveniente pa tur dos banda. Cu e concepto aki nos ta spera di trece e habitantenan di Aruba mas serca di otro pa bira un comunidad mas uni . E ganadornan di e team a ricibi como premio un pasashi ida y buelta pa cualkier destinacion di nan gusto cu ta wordo opera pa Inselair. Ademas, e team lo ricibi guia durante 3 luna pa sigui amplia y desaroya e concepto y realisa finalmente e Startup.