Sospechosonan di atraco San Nicolas deteni den mey ora

ORANJESTAD - Diamars mainta apenas mey ora despues di cu e melding a drenta na Central di Polis cu un señora di edad a wordo atraca den Helfrichstraat na San Nicolas, Polis a logra gara e sospechosonan den Village. E atraco a tuma luga na altura di Boogaard Assurantien. Testigonan a duna descripcion di e dos atracadornan na patruya di San Nicolas, cu distribui e informacion aki rapidamente pa tur Polis via radio cu activamente a sali pa sali busca y pa 8:05am a raporta detencion di e sospechosonan.

TREND POSITIVO

Polis ta riba un "trend" masha positivo di gara atracadornan apenas algun rato despues di nan acto. Mescos a sosode e ultimo dianan aki. Mester resalta cu e logro aki no ta posibel sin bon suministro di tip pa parti di testigonan. Cuerpo Policial ta gradici e bon cooperacion di comunidad. Cooperacion di pueblo ta importante den casonan asina, unda cu Polis ta bay den accion y ta haci detencionnan relampago danki na bon descripcion di e sospechosonan y tipnan valioso di comunidad. Ta hopi importante pa yama 100 asina cu un incidente tuma luga y comparti informacion cu Polis inmediatamente. Esaki ta haci posibel pa Polis por atende cu e victima mas lihe posibel, y tambe pa por yama pidi ayudo di coleganan na un forma efectivo y eficiente. Cuerpo Policial ta gradici tambe tur esunnan cu kier duna tip, pero kier haci  esaki na un forma anonimo via di telefon 11141. Laga un mensahe riba e tiplijn 11141 y tur mensahe lo wordo procesa.