Abogado Lejuez: Discusion ta legalidad di detencion di Carvajal

ORANJESTAD – “E discusion ta si e detencion di Hugo Carvajal ta legal si of no”. Esey ta e argumento principal di abogado Chris Lejuez cu ta defende e ex general. Despues di a papia cu hues comisario y fiscal diabierna atardi na Centro di Husticia, abogado a mustra cu e pregunta si su cliente ta goza di inmunidad como diplomatico, mester wordo contesta tambe. “Si esey ta e caso, su detencion no ta legal” Lejuez a finalisa bisando.

Loke ta haci e detencion aki diferente di un caso normal, ta cu ta trata di un persona diplomatico. “E momento cu hues tuma un decision, e ora Merca tin 60 dia pa entrega un peticion oficial pa su extradicion” Lejuez a bisa. Despues lo tin un huicio dilanti hof, cu tin cu avisa gobernador cu ta tuma e decision final. Abogado Lejuez a clarifica tambe cu nan trabou no ta pa mete den asuntonan politico, sino legal solamente. Como tal e no por a comenta riba e presion politico di Venezuela cu tin, pa libera su cliente. “Loke cu politiconan bisa ta conta pa nan cuenta” Lejuez a bisa. Atardi e lo tende di hues comisario si su cliente ta sali liber of no.