Bondscoach nobo a cuminsa cu preparacionnan pa FIFA World Cup Qualifier

ORANJESTAD - Siman pasa dialuna e bondscoach nobo di e seleccion di Aruba, esta Rini Coolen a cuminsa traha cu e departamento tecnico di AVB. Pa medio di un acuerdo di cooperacion (MoU) entre AVB y PEC Zwolle cu ta data for di aña 2014, Coolen ta staciona na Aruba pa su club, cu ta sigui paga su salario. Banda di Coolen su experiencia nacional y internacional, esaki tabata un punto di consideracion importante pa a tuma e decision di traha cu Coolen.

TRAHA HUNTO

Despues di algun dia di observacion di e ekipo, e bondscoach nobo y su ekipo a cuminsa traha hunto riba diahuebs. Ultimo E tin dos siman y mey pa prepara hunto cu e seleccion pa e di tres rond di “FIFA World Cup Qualifier”.

NO TA FACIL

E ultimo hungadornan di e ekipo cu ta bin for di Hulanda lo uni na e grupo dia 31 di augustus. Rini Coolen a comenta encuanto di e reto aki, “Mi a traha tres aña na Australia, unda ora mi a drenta mi tabatin dos siman pa prepara e team pa e cuminsamento di e competencia, e resultado tabata exitoso. E no ta facil, mirando e tempo cu mi tin cu e team, pero nos ta bay duna e miho di nos, e meta ta cla: nos kier cualifica!”

BON IMPRESION

El a splica cu el a haya den e prome dianan un bon prome impresion di e ekipo y e ta hopi positivo pa cu e esfuerso di e hungadornan cu el a observa na e trainingnan. Prome cu esaki el a concentra riba e ekipo di Aruba pa medio di materialnan visual, como tambe bishitanan wega nan di fogeo di e ekipo na Hulanda.

BON BALANS

E ta spera pues tambe di por crea un bon balans entre e hungadonan Arubano for di Hulanda y e hungadonan cu e ta entrenando actualmente na Aruba.