Muyale: Tiara Air cla pa cuminsa bula atrobe!

ORANJESTAD - Tiara Air ta anuncia reanudacion di buelo. Pa medio di su gerente Alejandro Muyale, Tiara Air a informa cu ta reanuda servicio di buelo y lo cuminsa bula pa Las Piedras, Punto Fijo riba fecha di 4 di September 2015. Segun Muyale, e aerolinea a completa tur rekisitonan pa cuminsa bula atrobe y ya tin algun siman ofreciendo servicio di Charter.

BUELONAN

E buelonan pa Las Piedras lo ta riba Dialuna, Diaranzon y Diabierna y lo hasi uso di e Boeing 737 cu tin un capacidad di 141 pasajero. Punto di benta di Tiara Air na Wayaca, Aeropuerto Internacional Reina Beatrix y tambe benta online (www.tiara-air.com) ta habri y cla pa sirbi tur cliente. Muyale tambe tin e placer di anuncia cu pa un tempo limita, Tiara Air lo ofrece pueblo di Aruba un prijs di promocion pa celebra reanudacion di buelonan.

MAS BUELO

Pronto Tiara Air lo ta compartiendo mas bon noticia tocante mas destinacion y actividadnan promocional. Por bishita nos website www.tiara-air.com of check Facebook pa mas noticia. “Danki pa e confianza den Tiara Air, y danki pa hunto cu nos duna un bon bini back na nos aerolinea Arubiano. Tiara Air su personal di buelo y demas miembronan ta warda bo pa sirbi bo y duna bo un caluroso Bon Bini” Muyale a finalisa bisando.