Polis a tira riba sospechoso durante persecucion na pia

ORANJESTAD - Un yamada pa un bringamento di pareha diamars algo prome cu 10or di mainta a haci cu Cuerpo Policial a manda un patruya di San Nicolas na altura di Hotel Royce na Savaneta. Ey berdad a topa cu un hende muhe maltrata. Na momento cu a bay detene e sospechoso, el a resisti y a core pa Polis, pa cual a start un persecucion na pia. Patras di Domino's Pizza na Savaneta, Polis a uza su arma reglamentario y a tira e sospechoso. Su situacion ta for di peliger.

MANEHO

Di acuerdo cu e maneho vigente, na momento cu un agente di Polis uza su arma reglamentario, mesora Lands Recherche ta tuma e investigacion over. Hunto cu departamento di Polisnan forensico y recherche, bou coordinacion y supervision di Ministerio Publico, ta investigando henter e caso.

TRANSPARENCIA

Pa por garantisa transparencia y un investigacion integro, semper Lands Recherche, cu ta resorta bou di Procurador General, ta encabesa investigacionnan asina, unda cu tin Polis envolvi uzando nan arma reglamentario.

INFORMACION LIMITA

Y pa e mesun motibo, Polis mes no por duna mas informacion na e momento aki, debi cu e investigacion mes ta den man di Ministerio Publico. Mester menciona cu e victima a entrega keho di maltrato pisa contra su pareha.