No a dicidi fecha ainda pa implementa maneho nobo pa turista

ORANJESTAD – Den conseho di minister di awe, mas probable gobierno lo dicidi riba e ‘medidanan nobo’ cu tin cu tuma contra turistanan ora cu nan drenta Aruba. Asina un fuente serca di e proceso a bisa NoticiaCla.com dialuna atardi ainda. Particularmente medida contra turistanan venezolano, unda cu entre otro mester mustra fondonan financiero pa por keda Aruba. Mientras cu conseho di minister a tuma decision riba aumento di suma cu un persona mester tin den su posicion, e fecha riba cual esaki mester keda introduci, ainda no ta mucho cla. “A compronde cu ta riba 1 di september esaki mester ta” un di e ministernan a bisa NoticiaCla.com. “Diamars ta trata esaki den conseho di minister”.

TURISTANAN DISPUESTO

Mientrastanto den practica, NoticiaCla.com a compronde cu na imigracion ora di entrada, personal di imigracion ainda no ta enforsando e cambio di maneho aki tampoco. Un otro medio ta raporta awe mainta cu turistanan cu tabata dispuesto pa mustra cu nan tin e suma necesario den nan cartera, lo a wordo bisa, cu nan no mester mustra esey ainda y cu pasaporte so ta suficiente. Pues ainda no tin un claridad riba ki dia e cambio aki ta drenta na vigor.

MEDIDA INICIALMENTE ANUNCIA

Tabata riba diahuebs siman pasa (20 di augustus), minister di turismo y transporte Otmar Oduber a participa cu 'e dia siguiente'  tur turista, -primordialmente venezolanonan-, cu yega Aruba, lo mester tabatin minimal 500 dollar cash den nan poder si nan kier drenta nos isla. Te cu awe, no tabatin un minimo di placa cu turistanan mester por a presenta. Mientras cu regla nobo ta conta pa tur turista, e mandatario a subraya cu e enfoke ta mas bien pa e venezolanonan cu ta purba drenta Aruba di un forma barata, y despues ta haya nan mes cu problema ora cu nan no kier bolbe nan pais. Fuera di e 500 dollar cu e turista mester tin den su poder cash, e mester por demonstra cu e por tin pa dia 200 dollar minimo na cash (no riba credit card). "Si bo keda dos dia bo mester tin 500 dollar, si bo keda tres dia, e mester ta 600 dollar. E ta bay 200 dollar aumenta cada bes" Oduber a bisa. Un notificacion a sali pa tur departamento local y internacional pa asina tur hende afo y na Aruba ta na altura di e medida cu ta drenta na vigor. E ta un medida pa esnan cu ta drenta Aruba. Esnan cu ta bin cu un vacacion regular, lo no mester tin problema pa cu esaki. E desicion aki mientrastanto a wordo para, ora cu a bira conoci cu den practica, esaki lo no por tabata posibel. Minister encarga cu imigracion, Arthur Dowers, lo mester a evalua e situacion y mira con liher esaki por a keda introduci. Oficialmente no a participa esaki ainda, aunke e fecha di 1 di september ta wordo menciona. 

E GRUPO VENEZOLANO PROBLEMATICO

Di e cuater gruponan di venezolano cu ta bishitando Aruba, e ultimo tendencia negativo awor ta e di 4 categoria cu ta e grupo cu ta bin Aruba, pasa nan dianan di estadia y busca manera pa keda na Aruba. Minister Oduber ta bisa: “E grupo aki naturalmente ta e grupo cu mas nos tin atencion riba dje y esey ta e grupo cu bo no ta desea. Den su totalidad e ta e grupo minoritario cual ta dificil pa midi exactamente cuanto esaki ta, pero tin esfuersonan cu ta wordo haci.” E mandatario a gradici e trabou inmenso di Inmigracion cu ta wordo haci conhuntamente cu aeropuerto, cu ta detecta na tempo un gran cantidad di e personanan aki y manda nan bek. Sr. Oduber ta sigui comenta: “Tin biaha ta entre 20 pa 30 hende nan ta manda bek pa dia riba e mesun avion ora nan no cumpli cu cierto criterionan cu tin stipula, of si tin sospecho di no tin e actitud di un turista.”Recientemente den Ministerraad a tuma un decision cu inmediatamente ta implementa un criterio nobo pa e purba frena e tendencianan negativo cu no ta beneficia nos isla. Minister Oduber ta splica: “Nos a notifica mesora tur instancia tanto local y internacional cu desde awe ta subi e grado cu un minimo di 500 Dollar cash cu bo mester tin den bo posesion na yegada di Aruba y cada dia cu un persona keda Aruba e mester tin 200 dollar. ” Por ehempel pa si ta un dia e pasahero ta keda Aruba e mester tin 500 Dollar cash den su posesion, si e ta keda 2 dia tambe e mesun cantidad di 500 Dollar ta vigente y si e keda tres dia e ta bira 600 dollar etc. Cu e decision aki kier frena entre otro tendencia di esunnan cu ta bin Aruba y busca manera pa keda, pero tambe kier disminui e grupo cu ta contribui lo minimo cu nos economia cu ta esun cu ta raspa carchi purbando di keda cu mas di e placa posibel den nan mesun cartera.