Hopi atencion politico pa tratamento ley AFT diahuebs

ORANJESTAD – Anticipacion pa e reunion publico di diahuebs awo cu tin cu trata e concepto di ley riba supervision financiero, -segun comentario-, ta mas grandi mes cu p.e. uno di presupuesto. Sigur, asina partidonan di oposicion ta ‘atendiendo’ cu e reunion aki. Gobierno di su banda, ta trata esaki como un reunion importante, pero cu su merito pa cumpli cu un presupuesto balansa aki dos aña. Oposicion, di otro banda ta yamando su hendenan pa presenta masalmente diahuebs cu e lema ‘Awor t’e ora, baha na awa’. 

GOBIERNO

Segun prome minister Mike Eman, no ta nada di un forma di implementa medida. ‘Gobierno ta pone den e ley aki, e normanan cu nos kier logra pa locual ta trata un presupuesto balansa y tambe pa yega na reduci e deficit na tempo y reduci e debe di pais Aruba”. Como tal, nan no ta mira cu esaki ta bira un ley cu ta impone mas medida riba pais Aruba. E mandatario ta admiti cu semper tabatin diferencia di opinion cu fraccion di MEP, cu semper ta pensa cu ta cu medida so bo por logra di baha bo deficit. “Nos ta kere cu si, tin bes bo tin cu haci cierto ahustenan, sigur sigur no semper pa entrada pa gobierno, pero pa sigura cu bo fondo di pension ta keda solido” asina e mandatario ta menciona mas motibo pa cual tin cu tuma e pasonan aki.”Den mundo di oposicion, pa nan semper prome cos cu nan ta haci ta medida, tras di medida” Eman ta bisa.

AVP

Apesar di cu e fraccion di AVP no a caba di fiha su punto di bista riba e ley di supervision cu lo trata e siman aki den Parlamento, lider di fraccion di e partido berde, Rene Herde, ta sigura cu e fraccion lo asumi un posicion constructivo den esaki. Rene Herde': "Esaki kier men cu nos ta bai trata e ley aki, manera semper cu e pregunta central, kico ta bon pa Aruba y con miho pa atende cu e situacion aki. E ley aki ta djis un parti di e totalidad di e relacionnan den Reino. Na mes un momento nos mes kier sigura cu finansa publico semper sirbi interes di nos pais y no interes di un grupo of un famia so manera a sosode bou di MEP. Nos mes kier finansa publico sostenibel, pesey nos mes a fiha e normanan di "balanced budget" cu ta e normanan den e ley aki. Nos mes a traha e cuadro financiero di 2014-2017 cu ta base di e ley aki.

MEP

Pa fraccion di MEP, e partido mas grandi den oposicion, e ley di CAFT ta un ley cu ta bai contra nos principionan democratico, pasobra Parlamento, e organo cu mester controla gobierno, ta wordo poni un banda. “Parlamentarionan ya no tin tur espacio pa trece amienda of eherce nan derecho di presupuesto (Budgetrecht)” Evelyn Wever como lider di e partido, ta bisa”. Es mas, den e ley di CAFT mes, ningun parlamentario por cambia ni un punt, ni un coma. Esaki ta violacion di nos Constitucion y ta berguensa cu e gobiernonan di Aruba y Hulanda ta hasi algo asina. Na Hulanda nan lo no a tribi mes di hasi algo asina”. Pero, segun Wever, “ tur hende sa dicon nos a cai asina abou: pasobra nos tin un gobierno iresponsabel”.NoticiaCla.com no a logra haya e posicion di e partido cora ainda. E partido a haci un yamada tambe pa bay protesta diahuebs mainta tempran na parlamento ora cu e tratamento di e ley cuminsa.