Rijksrecherche ta busca testigo den caso di morto Mitch Henriquez

DEN HAAG – Rijksrecherche ta buscando un ‘testigo importante’ den e investigacion den morto di Mitch Henriquez. Asina e programa “Opsporing Verzocht’ a raporta na Hulanda dialuna. Diamars nan lo mustra e imagen di e testigo, cu ta visibel riba varios imagen cu testigonan ocular a saca ora cu Henriquez a keda deteni dia 27 di juni na e Zuiderpark na Den Haag.

MITCH HENRIQUEZ

E persona cu ta wordo busca, lo no wordo presenta den un forma reconocibel, segun vocero di ministerio publico di Den Haag, Wouter Bos. “pero esun cu sa di ken nos ta papiando, si lo reconoce su mes, basa riba e paña cu e tabatin bisti of e postura, of e lugar unda e tabata para” e vocero a sigui bisa.

E CASO MES

Henriquez fin di juni a haya su mes den un discusion cu polis riba e festival “Night at the park”. Ora cu nan a ‘apodera’ di dje, e no por a hala rosea mas y a bira ‘malo’. Un dia despues el a fayece. Mientrastanto tin 5 agente policial suspendi y ta marca como sospechoso den e caso aki. Cuater dia di disturbio a sigui na e sitio unda cu e incidente a tuma lugar, durante cual mas di 200 persona a keda deteni. E investigacion ta continua pero no tin mas informacion riba e caso. NOTA: e foto ta durante e disturbionan cu a sigui na Zuiderpark, despues di morto di Mitch Henriquez.