Aruba ta perde 9-0 for di Puerto Rico den futbol Damas clasificatorio Rio 2016

SAN JUAN – E seleccion di futbol damas di Aruba a perde diadomingo ultimo cu un score di 9-0 contra e seleccion di e pais anfitrion Puerto Rico. E weganan clasificatorio pa ruta Rio de Janeiro 2016. E seleccion di Aruba a sali siman pasa diahuebs pa Puerto Rico, pa por a hunga nan prome wega diabierna caba. E score di esaki no ta conoci. Lamentablemente nan a cay venci diadomingo contra Puerto Rico. E proximo wega ta diaranson contra Grenada.

DESAROYO DI WEGA

Pa loke ta e partido di diadomingo den e stadion Juan Ramón Loubriel, Puerto Rico a cuminsa for di inicio di e wega contra Aruba, pa pusha e ofensiva, pero sin resultado. E prome goal contra Aruba tabata den e di 11 minuut ora cu Karina Socarrás a anota pa Puerto Rico. E siguiente goal a bin na e di 24 minuut ora cu Socarrás un biaha mas a anota. E mesun persona ta anota apenas 5 minuut despues. Y asina e wega ta sigui. Na di 36 minuut otro goal contra Aruba. Na e momento ey, Aruba a haci su prome cambio, ora cu Michella Werleman a drenta na lugar di Donnevier Luitjes. Aki tambe Zahira vd Linde a haya e prome carchi hel pa Aruba. Na di 49 minuut, Socarrás a hinca otro goal, cu a pone e wega e ora ey na 6-0.

PREPARACION DI ARUBA

Manera ta conoci, e prome rond di e cualificacion Olimpico di Rio de Janeiro 2016 den futbol femenino a inicia den e region di Caribe unda cu e seleccion nacional di Aruba tambe lo mester a hunga tres partido na e pais di Puerto Rico. Despues di un preparacion di casi cinco siman, e seleccion di futbol femenino forma pa mayoria hungadonan di Britannia, RCA, Bubali, Savaneta Stars, Santa Fe y Dakota ta cla pa duna bataya den un total di tres wega cu mester wordo hunga na Puerto Rico. Awe diabierna ya Aruba ta mira accion ora nan enfrenta e fuerte seleccion femenino di Haiti. Diadomingo e seleccion femenino di Aruba a enfrenta e seleccion femenino di e pais anfitrion cu ta Puerto Rico. Por ultimo diaranzon dia 25, e seleccion femenino di Aruba lo hunga su ultimo partido contra di Greneda. Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e seleccion nacional di futbol femenino pa e clasificacion Olimpico Rio 2016 na Puerto Rico. NOTA: E foto principal ta di e wega di diadomingo ultimo, di e ekipo di Puerto Rico, y e otro paden, ta di esun di Aruba na nan salida diahuebs ultimo. 

.