Ayudo financiero na e famianan cu bijstand pa aña escolar 2015/2016

Posted on 8/25/2015, 9:50 AM AST | Updated on 8/25/2015, 9:54 AM AST

ORANJESTAD – Departamento di Asunto Social ta informa un biaha mas cu pa e aña escolar 2015/2016 Gobierno lo duna un apoyo financiero extra atrobe na e famianan cu ta ricibi bijstand y cu tin yiu(nan) cu ta bay scol.

E ayudo ta pa:

Famianan cu ta ricibi bijstand. Mayornan di yiu(nan) of yiu(nan) di criansa cu ta bayendo scol te cu e edad di 24 aña y cu tin derecho ariba bijstand te cu e pago di luna di augustus 2015. Alumnonan di Scol Preparatorio (“Kleuterschool”) . Alumnonan cu ta bishita scol regular durante dia (“volledig dagonderwijs” y cu no ta un scol priva).

Condicionnan ta:

Cu e yiu(nan) ta bibando na Aruba y cerca e mayor(nan) den cas. Cu e yiu(nan) ta inscribi na scol pa e aña escolar 2015-2016.

E sosten extra ta wordo duna den dos forma:

Pa cada yiu cu ta bay scol famia por ricibi AWG 120,- extra (te na un maximo di AWG. 500,- pa famia) pa asina yuda cubri un parti di e gastonan extra cu tin. Ta paga e placa aki hunto cu e pago regular di bijstand na luna di september 2014.  Ayudo pa cu e pago di e contribucion cu e mayor mester paga anualmente na e scol te cu un maximo di AWG 120,- (aki kiermen sin gasto extra manera airco of otro) pa mucha/studiante.

E placa aki ta wordo paga directamente na e scolnan concerni y si e contribucion ta surpasa e suma di AWG 120,-, e mayor(nan) mes mester paga e diferencia.

Kico mester haci:

Mayornan mester busca e formulario na e scol na unda e yiu(nan) ta inscribi entrante 14 di augustus 2015. Mayornan mester yena e parti abou completo di e formulario unda e mayor(nan) tin cu firma esaki. Mayornan ta entrega e formulario (yena completo y cu firma bou dje) na Departamento di Asunto Social na Oranjestad, prome of te cu dia 28 di augustus 2015, sin excepcion. Entrega e formulario na oficina principal di Departamento pa Asunto Social na Oranjestad situa na Caya Mario E. Harms 11 (ex-Lagoenweg), durante oranan di trabou, di 8:00 am te cu 11.45 am y di 1:00 pm te cu 4.15 pm.       Pa mas informacion, yama libremente na telefon: 582-1100 y puntra pa Seccion di Bijstand.

 Por fabor tuma hopi bon nota di lo siguiente!!! Solamente si a entrega e declaracion di scol prome of te cu dia 28 di augustus 2015, por bin na remarca pa e pago aki na luna di september 2015. Den caso cu no a entrega e formulario di scol prome cu e fecha di 28 di augustus 2015, Departamento di Asunto Social no tin e prueba necesario cu enberdad e yiu(nan) ta na Aruba y cu ta bayendo scol (ainda) y esaki lo tin como consecuencia:

Cu e bijstand di famia ta baha. Famia lo no por bin na remarca pa e placa extra ariba e pago di bijstand di luna di september 2015. Esun cu ta bay scol lo no bin na remarca pa placa di e contribucion di mayor (“ouderlijke bijdrage”) cu mester paga na e scol anualmente.

Departamento di Asunto Social lo mester evalua e situacion di famia di nobo y pa haci esaki lo blokea e bijstand pa luna di september 2015 den caso cu no entrega e formulario di scol.