Eman: Pa fin di aña mester sa si reapertura di refineria ta factibel

ORANJESTAD – Gobierno di Aruba ta purba keda cla pa aki 3 siman por formula un Memorandum of Understanding cu e compania Citgo, y pa mas tarda december, keda cla cu e decision si ta bin un cumprado pa e refineria of no. Esey por lo menos ta e plan di gobierno manera presenta dialuna pa prome minister Mike Eman. Relatando di su biahe relampago na Hulanda, a confirma tambe cu e compania GasUnie ta interesa atrobe, como posibel partner ‘cu un otro desaroyador di e refineria’, cu posiblemente lo mester bira Citgo. Tambe lo papia cu Grupo Piñeros pa wak si por convence nan pa cambia di pensamento pa bandona nan proyecto si bin un refineria.

MOU

Segun Eman, nan a haya consecion di Hulanda cu lo asisti cu expertonan den un comision mutuo, cu den un periodo di 3 siman, lo formula e miho forma pa por desaroya un refineria mas ‘berde y sostenibel’, cu lo wordo presenta na Citgo. Unabez cu esey logra, lo firma un MoU cu e compania ey, cu ta haya te fin di aña pa haci un due diligence y dicidi si nan ta bira e proximo cumprado di e refineria. Mes momento minister Mike de Meza a biaha pa Houston pa papia cu Citgo, unda cu e lo mester a informa e compania di e ultimo desaroyonan discuti na Hulanda.

REFINERIA BERDE

E mandatario a bin cu informacion cu ta duna na un posibilidad toch pa bin cu un forma di refineria berde, cu por funciona na Aruba y cu no tin cu deshaci di un eventual otro industria, manera e proyecto hotelero cu ta na caminda.