Aruba representa na e “Annual curators” meeting di Global Shapers

GENEVA – Recientemente Aruba tabata representa na e ‘annual curators meeting’ di Global Shapers na Geneva, Suiza. Ta trata di mas di 450 lidernan hoben di rond mundo hunto, pa un encuentro importante organisa door di World Economic Forum. E reunion cua tuma lugar entre 13 pa 18 di augustus 2015, a permiti e participante nan un experencia hopi valioso, cu concentracion riba balornan y un cultura di excelencia comun, como instrumento necesario pa enfrenta reto nan local.

RED GLOBAL PA HOBENNAN

Na 2011, World Economic Forum a crea un red global pa hobennan entre 20 pa 30 aña cu a demostra gran potencial como futuro lidernan dentro di sociedad, cu e intencion pa conecta e hobennan aki, como tambe brinda nan e oportunidad pa tin un voz den dialogo.

ARUBA PRESENTE

Pa prome biaha Aruba, por cierto como un di e poco isla nan den Caribe inclui den e iniciativa aki di World Economic Forum a ser representa pa Rendell de Kort, kende ta encarga pa coordina e grupo di Global Shapers na Aruba (Oranjestad), a splica cu e iniciativa global aki a yega Aruba hopi recien ora World Economic Forum a drenta den contacto cunepa establece un ‘hub’ na Aruba, mescos ta e caso caba na mayoria ciudad grandi na mundo. “E reunion anual di curators, ta permiti cada hub tin un representante, y e oportunidad pa eleva e voz di su pais den temanan relaciona cu tecnologia, politica y educacion entre otro”, segun de Kort, kende ta Economista na Banco Central di Aruba y presidente di Kiwanis Club of Young Professionals Aruba. De Kort a splica cu actualmente e hub di Global Shapers Oranjestad ta consisti di 5 miembro. E intencion ta pa amplia esaki pa sigur 15 miembro den e proximo luna nan.

POTENCIAL GRANDI

“Nos ta sumamente contento pa por ofrece hobennan cu un potencial grandi pa impacta comunidad den un manera positivo e oportunidad pa conecta cu lidernan hoben rond mundo, e curator di Aruba a menciona. Mas cu tur cos nos ta spera cu hobennan tin e compromiso y e passion pa dedica tempo pa traha hunto cu otro hobennan excepcional, pa asina intercambia idea y ehecuta proyecto nan pa mehora e mundo aki”, segun de Kort. Esnan interesa den mas informacion por tuma contacto cu e hub di Global Shapers di Oranjestad via nan pagina di Facebook como tambe pa medio di email: dekort@gmail.com.