Hooyboer: Unit managers EPI por haya contesta otro siman!

ORANJESTAD - Contrario na e 4 ora cu un grupo di 9 unit manager di Educacion Profesional  Intermedio (EPI) a pidi gobierno, nan tin cu warda un siman mas. Esaki minister di enseñansa Michelle Hooyboer a confirma na NoticiaCla.com diadomingo. Segun e mandatario, simplemente mester di mas tempo pa por keda cla cu tur loke a wordo pidi. “E unit managers di EPI tin un verzoek oficial tocante nan rechtspositie y gratificatie” e mandatario a bisa, y esey ta canando su caminda. Y esey no ta logra den e tempo cu e grupo a ‘pidi’ diabierna ultimo pa medio di un carta.

CARTA

Tabata diabierna ultimo cu minister a ricibi un carta di SIMAR riba e caso ,-cual NoticiaCla.com a pone su man ariba-, cu ta duna minister un tempo di 4 ora (e mesun diabierna), pa duna un contesta riba e dos puntonan cu nan a pone den e carta. E prome punto tabata cu e 9 unit managers tabata kier un toelage di 25% , cu 2 aña forza retroactivo bayendo bek pa e aña escolar 2012/13. Den e punto number dos, e mesun unit managers kier un luna di salario cu forza retroactivo, bayendo bek 5 aña te na aña escolar 2006/07.

ULTIMATUM

E ultimatum poni, segun e carta, ta pasobra nan ta desapunta riba e tardansa pa un solucion pa e problema urgente y e seriedad di e problema. Nan ta mustra cu mientras cu e situacion perdura, e por resulta den un escalacion sin mas. E carta ta firma pa presidente di sindicato di maestro SIMAR, esta sra Sheila Lazo-Tromp.

REACCION RIBA CARTA

Como contesta riba e carta, minister Hooyboer a splica NoticiaCla.com diadomingo pues, cu ‘e unit manager di EPI tin un peticion oficial tocante nan posicion huridico y gratificacion’. “E ta canando e proceso conforme procedura pa departamentonan concerni duna conseho. Specialmente mirando cu ta algo cu ta data di nan funcion bek pa 2006”. Como tal e proceso lo por tuma por lo menos un siman mas. A confirma tambe cu por spera un contesta pa 1 di september proximo. Lesa e carta di SIMAR aki. Y esun cu e firmanan aki.