Croes: Gobierno cu 30.000 florin pa Mary Joan Foundation

ORANJESTAD - Gobierno lo duna un suma di 30.000 florin pa Mary Joan Foundation. Durante e evento di recaudamento di fondo pa Mary Joan Foundation, minister Paul Croes di asuntonan social a anuncia den su discurso cu Gobierno di Aruba a hasi un ehercicio financiero y ta bai aloca e suma pa Mary Joan Foundation. Tin tareanan social cu e fundacion ta desplega y Gobierno kier apoya e fundacion den e trabou aki. E apoyo na victimanan di cancer na pecho y tambe nan famianan ta keda importante.

AYUDO NA E FUNDACION

Cu a apoyo aki, segun Croes, e fundacion lo por concentra mas riba e tarea principal di e fundacion. “Lo formalisa e subsidio aki den transcurso di e simannan nos dilanti pa asina bai cu esaki Parlamento di Aruba den tratamento di presupuesto”. Minister Paul Croes di su banda tambe a hasi un esfuerso den comercio pa asina logra haya e suma di 7500 florin pa Mary Joan for di Caribbean Mercantile Bank, y tambe e hobennan di Poder di Hubentud conhuntamente a colecta un poco mas di AWG. 3,000.00. Minister di Asuntonan Social drs. Paul Croes lo sigui busca forma pa apoya nos fundacionnan cu meta social na Aruba.