Total di 211 studiante di MAVO a drenta HAVO e aña aki

ORANJESTAD - Un total di 211 studiante di MAVO a drenta HAVO e aña aki .Esaki ta 65% mas cu e aña anterior, segun un comunicado di ministerio di enseñansa. Manera ta conoci, recientemente minister di enseñansa, Michelle Hooyboer-Winklaar a oficialisa normanan nacional cu ta determina e criterio di admision pa studiantenan procedente di MAVO por drenta HAVO 4 pa continua nan estudio. Esaki despues di hopi aña di discusion entre SMOA/Colegio Arubano y Gobierno y otro instancianan den enseñansa. Awor normanan ta uniforme y ta aplicabel pa ambos HAVO, pues tanto esun na Oranjestad como tambe esun na San Nicolas.

RESULTADO

Hooyboer-Winklaar a ricibi informacion for di Colegio Arubano y Colegio San Nicolas tocante di cuanto alumno di MAVO a drenta HAVO. Na Colegio Arubano (Oranjestad), un total di 73 graduado di MAVO a drenta HAVO 4 y na Colegio San Nicolas un cantidad di 61 graduado di MAVO a drenta HAVO 4 y 77 a drenta e trayecto di 3 aña di HAVO. Pues na tur ta conta un total di 138 studiante. Esaki ta un aumento considerabel di 65% na Colegio Arubano si compara cu aña pasa 44 graduado di MAVO a drenta HAVO 4 na Colegio Arubano. "Mi ta hopi contento pa mira e progreso aki y ta mira dos factor cu a contribui na esaki. Na prome luga, miho resultado den slaagingspercentage na MAVO aña pasa y banda di esaki e introduccion di nos normanan nacional", asina e Minister encarga cu Enseñansa a enfatisa.