No ta existi un cos manera un refineria ‘berde’ na mundo

ORANJESTAD – No ta existi un cos manera un refineria ‘berde’ na mundo. Tanto vocero di refineria Valero como abogado di grupo Piñeros a papia riba e tema ey cu NoticiaCla.com. “Tur refineria ta industrial, ta sushi. Un mas sushi cu otro, y uno menos sushi cu otro” tabata palabra di abogado Ronny Wix, cu ta fungi como abogado di e doñonan di e proyecto hotelero Bahia Principe, esta Grupo Piñeros. Mientras cu e no a toca e tema aki cu su clientenan, for di experiencia, e la haci mencion di esey den un combersacion recien cu NoticiaCla.com riba e topico.E contesta di vocero di e refineria, Bill Day, tabata cu ‘tur operacion industrial tin emision, esta gas, huma, sushi”, pues no ta existi refineria sin esey pues ‘berde’.

REFINERIA ‘BERDE’ PA SAN NICOLAS

E pregunta na e abogado, tabata si e la discuti e topico di un posibel ‘refineria berde’ cu su clientenan den un forma pa ‘topa otro (refineria y desaroyo sostenibel) mitar caminda’, esta pa bin cu un tipo di refineria mas ‘berde’ y asina logra cu por tin tanto e hotel como refineria. Asina lo por elimina e dilema manera cu a keda presenta recientemente pa prome minister Mike Eman den un entrevista cu Caribisch Netwerk. Na tal occasion premier Eman a bisa cu ‘si e reapertura di e refineria sosode cu un maneho mas ‘sostenibel’ y duradero, y inclui traspaso di pidanan grandi di tereno bashi y no usable bek pa Aruba, e decision pa un reapertura lo ta mucho mas facil. De hecho, gobierno kier net un acercamento mas ‘berde’ y duradero, cu ta algo cu segun e premier, tin un posicion delantero riba tereno internacional’. (lesa e articulo aki) “Ami no a papia cu mi cliente riba e punto ey” Wix a cuminsa na bisa. Pero mes momento, e la bisa si cu ‘there is no such thing as a green refinery’. Segun Wix, ora cu tin un turista cu ta paga 600 dollar pa dia pa keda den un hotel di luho, bo no ta bay landa den un beach y sinta riba un stul, cu un bista di un refineria.

CONFIRMACION DI VALERO

Refineria Valero tambe a confirma esaki na NoticiaCla.com den fin di siman. E pregunta tabata cu ‘Si tabatin un ‘cos’ manera un asina yama ‘refineria berde’, den forma cu e ta opera di un forma mas ‘sostenibel’, compara cu e forma cu e tabata opera prome. E contesta di vocero di e refineria, Bill Day, tabata cu ‘tur operacion industrial tin emision, esta gas, huma, sushi”, pues no ta existi refineria sin esey pues ‘berde’. Mes momento Day a confirma tambe cu tur e operacionnan, tin nan debido permiso di operacion cu e emision menciona.

COMMITMENT

Bek pa e abogado, e la confirma cu no ta un discusion si ta traha e hotel si tin un refineria. Di otro banda, no tin ningun clausula unda cu gobierno a priminti cu lo no tin un refineria, como condicion pa traha e hotel. ‘Gobierno su posicion semper tabata cu nan, formalmente, no por haci e commitment cu e refineria ta bay habri of no, pasobra e no ta di gobierno’. “Pero Valero a duna di conoce den diferente occasion, cu nan ta bay dismantle e refineria” Wix a sigui bisa. Segun e abogado, un conclusion logico ta ,-ora cu gobierno bisa cu e decision no ta di nan, y Valero ta bisa cu nan ta bay decision di desmantela-, cu e refineria ta bay wordo desmantela.

CONDICION PIÑEROS

Riba e pregunta specifico na e abogado, cu si e condicion di su cliente “Grupo Piñeros” tabata cu e lo bin eynan (pa traha hotel), si no tin un refineria, e contesta di e abogado tabata “Claro”. “Nan tabata te hasta willing pa cuminsa construccion, sin cu a kita tur cos di e refineria. As long cu e no ta operational”. Mes momento, ta admiti cu grupo Piñeros, a bay den un deal cu gobierno, asabiendas cu gobierno no por a garantisa esey (esta cu no ta bay tin un refineria). Riba esey tambe, e abogado a bisa ‘si. Corecto’. Di otro banda, e abogado ta desmenti cu e lo tabata un risico, “pasobra Valero a bisa cu nan ta bay dismantle e. Pues no tabatin risico. Esun cu tabata autorisa pa bisa algo riba e rafinaderia, a bisa no un biaha sino keer op keer, cu nan ta bay sera e refineria y ta bay dismantle e” Wix a sigui bisa. “Awor esun cu ta bisa cu ta bay stop e, ta gobierno” abogado Wix a sigui bisa. Finalmente, Wix a sigui bisa cu su cliente a bisa cu “Si e refineria habri, nan ta out”.

NO TIN HALF WAY

“Loke mi por bisabo, ta cu niun rato nos a papia cu si nos ta bay ‘on hold’ si e refineria habri. E punto tabata semper cu si e refineria mester habri, nos ta out. Period. No tin half way”. Wix a continua bisando. “Hende mester stop di hunga e wega di porta si, porta no. Tin cierto cos cu ta gewoon preto riba blanco. Refineria habri, no ta bay tin hotel. Period. No laga ningun hende gañabo otherwise. No ta Piñeros so sino otro cliente tambe” e abogado a subraya.