Bapor crucero lo desvia pa Aruba pa ‘evita’ tormenta Danny

SAN JUAN – Aruba lo haya bishita ‘inespera’ di un bapor crucero e siman aki, ‘cortesia’ di tormenta tropical Danny. Por lo menos dos liña crucero ta afecta pa loke ta awor tormenta tropical Danny. For di diabierna ora cu Danny tabata un horcan ainda, e companianan Royal Caribbean y Carnival a altera nan itinerario segun e Royal Caribbean blog, pa evita Danny. Y como tal Aruba a wordo ‘inclui’ den e itinerario di e bapor crucero Adventure of the Seas. Algo cu ta normal den temponan di horcan, cu ta uza Aruba como un ‘alternativa’ riba e rutanan di Caribe.

ITTINERARIO NOBO ADVENTURE OF THE SEAS

E ultimo bishita ‘gescheduled’ pa Aruba e luna aki, di Adventure of the Seas, tabata diaranson 12 di augustus. Pero no pa e resto di e luna aki. De hecho, solamente tres otro bapor crucero tabata programa pa bishita Aruba e luna aki ainda. Awor Adventure ta bishita Aruba dos biaha. E compania a anuncia diabierna cu e crucero lo bishita e parti west caribense enves di oost. Adventure of the Seas tabata programa pa bandona San Juan diasabra dia 22 y bishita St. John, Antigua, St. Lucia y Barbados. Pero awor, segun e compania, su itinerario nobo ta inclui St. Maarten, Aruba, Bonaire y St. Thomas. Sinembargo, cu St Maarten riba e ruta, no ta conoci si esey tambe lo a cambia. NOTA: foto ta di Adventure of the Seas durante un di su bishitanan na Aruba.