St Maarten ta ‘shut down’ te proximo aviso pa tormenta Danny

PHILIPSBURG – Negoshi y scolnan ta keda sera te proximo aviso. Asina prome minister di St Maarten, Marcel Gumbs a informa su ciudadanonan durante un discurso diadomingo. Ademas e mandatario a informa tur loke a wordo haci na preparacion, y kico por spera e proximo 24 oranan. “Awacero por ta di 2 pa 4 inch. Tin posibilidad pa inundacion den cierto caya. Condicion di tempo lo deteriora laat diadomingo of tempran dialuna” e mandatario a sigui bisa.

LIMPIESA

Companianan di sushi tabata recohe sushi diasabra y a continua esaki diadomingo te merdia. Esaki pa evita cu articulonan por bira proyectil y tambe cu sushi por tranca pasada y fluho di e awa dado momento. A opta pa habri e shelter di horcan St Peters pa cualkier eventualidad. Scolnan lo a keda sera dialuna y tambe lugar di crèche, edificionan di gobierno y tur negoshi. Esey tabata inclui restaurant y casino for di diadomingo anochi 10’or. Aerolineanan tabata opera normalmente y biaheronan mester a check individualmente dialuna riba e status di nan buelo. E mandatario tabata poni pa duna un update dialuna merdia, riba e situacion. NOTA: Foto ta di e reunion di instancianan di gobierno di St Maarten reuniendo diadomingo riba tormenta Danny. Foto cortesia www.stmaartengov.org