Gobierno ta promove optimismo den Caya Grandi, pero e mensahe ta keda unidireccional

ORANJESTAD - Gobierno di Aruba den fin di siman a circula un articulo oficial den cual varios comerciantenan di Caya Grandi ta wordo presenta como voz di apoyo pa e reciente iniciativa di e taskforce “Convivencia: Centronan di Ciudad Sigur y Humano”. E articulo ta pinta un cuadro di optimismo y confianza den direccion cu ta wordo tuma pa revitalisa centro di Oranjestad, pero e contenido ta claramente produci dentro di un marco gubernamental cu ta enfoca riba resultado positivo.

OBIZ Y REACCION DI COMERCIANTENAN

Den e articulo, representante di OBIZ, Elton Arends, ta wordo cita bisando: “Nos ta hopi contento cu gobierno a cuminsa move riba e problematica aki. Esaki tabata algo urgente pa nos sector.” Arends tambe a enfatisa cu e iniciativa por crea confiansa pa inversionista y cambia completamente cara di Caya Grandi den añanan cu ta bini: “Den e proximo añanan nos por mira un Caya Grandi completamente diferente y renoba.” Comerciante Solanys Wever-Quintero di Star Fashion tambe ta wordo presenta como un voz di apoyo, indicando cu despues di añanan di espera, finalmente tin accion: “Nos ta mira cu tin apoyo real. Esey ta duna nos mas confiansa pa sigui traha y inverti den e area.” Di banda di experiencia, Benchi di La Moderna tambe a wordo cita, resaltando importancia di colaboracion:“Mi ta kere cu si nos traha hunto, nos por mantene Aruba limpi y mehora nos centro di ciudad.” Segun e articulo di gobierno, reaccion di comerciantenan ta indica un cambio di preocupacion pa speransa, y di estancacion pa movimiento.

TONO UNIDIRECCIONAL 

Sin embargo, e tono general di e pieza ta unidireccional, enfocando principalmente riba percepcion positivo y confianza, sin profundisa den posible preocupacionnan, reto practico of critica cu tambe por existi den sector comercial. E taskforce ta wordo presenta como un paso importante pa crea un centro di ciudad mas limpi, sigur y humano. Pero pa un bista completo, lo mester sigui observa con e medida nan ta wordo implementa y con e impacto real ta wordo sinti den practica pa tur parti involucra.