Gobierno a activa ‘Taskforce’ pa centro di ciudad rescata Oranjestad

ORANJESTAD - Gobierno di Aruba a lansa un taskforce interministerial pa duna bida nobo na centro di Oranjestad, cu enfoke riba siguridad, convivencia y desaroyo urbano. Den un encuentro cu prensa na Elleboogstraat, autoridadnan a splica cu e iniciativa ta parti di un vision mas amplio pa transforma area bandona den espacionan funcional y atractivo.

E taskforce, cu ta inclui representante di diferente ministerio, tin como meta coordina accionnan social, preventivo y di siguridad, y crea un plan pa 2025–2027. Tambe lo traha hunto cu sector priva y organisacionnan social pa logra un enfoke sostenibel.

Un ehempel importante ta e renovacion di e ex edificio di Music Box, cu a pasa di abandono pa un simbolo di oportunidad. Segun gobierno, e proyecto ta mustra cu revitalisacion di ciudad ta un proceso continuo basa riba cooperacion y compromiso cu comunidad, cu meta final di crea un centro mas sigur, humano y atractivo.