FTA: Denuncia contra gerencia Thrifty Car Rental pa intimidacion

ORANJESTAD – Sindicato FTA a haci un denuncia publico di intimidacion contra gerencia di Thrifty Car Rental. Segun presidente di e sindicato Hubert Dirksz, riba 21 di augustus (diabierna atardi) a tuma lugar e referendum na Thrifty Car Rental cu a wordo pidi door di FTA. “ Apesar di menasanan fuerte cu trahadornan mester a soporta di gerente di e compania durante e ultimo dianan, -cualnan a wordo denuncia na Mediador di Gobierno-, 8 di e 24 trahadornan cu derecho di voto a presenta na e referendum di cual tur a vota na fabor di sindicato FTA” Dirksz a bisa.

INTIMIDACION DI GERENCIA

Aunke FTA no a logra mayoria, di tur manera a gradici tur e trahadornan balente cu apesar di tur intimidacion a sa di presenta na Mediador di Gobierno y haci uso di nan derecho di voto. “FTA ta lamenta profundamente cu bou di algun dunador di trabou cu ta pretende di no tin nada di sconde, ainda ta biba un temor inmenso pa sinta na mesa cu un sindicato y negocia condicionnan di trabou”. Mes momento a manda un carta pa mediado di gobierno Anselmo Pontilius, protestando contra e hecho cu e gerente general di e compania, esta Rudy Perrotte tabata intimida y menasa e trahadonan. Den e carta e la solicita mediacion di e mediado y pa e hala e atencion di e gerente. 

LO KEDA DENUNCIA ACTONAN

Segun e presidente, FTA lo keda denuncia e tipo di actonan baho aki, pasobra e ta totalmente inaceptabel cu apesar di tur nos leynan laboral, derechonan di e trahador ta wordo trapa di e forma aki. FTA lo keda monitorea e situacion na Thrifty Car Rental di hopi cerca y lo sa di defende cada un di su miembronan contra cualkier tipo di represaya di parti gerencia.