ABC ta pidi pa ESG nacional: Direccion nobo pa desaroyo sostenibel di Aruba

ORANJESTAD – Un grupo ambientalista, Aruba Birdlife Conservation, a presenta un proposicion formal pa introduci un marco nacional di ESG (Environmental, Social & Governance) na Aruba, cu meta di logra un balance entre crecemento economico, progreso social y proteccion di medio ambiente.

Segun e documento, Aruba ta na un momento critico unda desaroyo economico mester bai hunto cu sostenibilidad. Como isla chikito cu ta depende hopi di turismo, e proteccion di naturaleza y  stabilidad social ta esencial pa su futuro.

E proposicion ta enfoca riba crea un sistema  structural unda empresanan ta raporta nan impacto riba medio ambiente, sociedad y forma di goberna . Esaki lo aumenta transparencia, y alabes yuda empresanan maneha riesgo y posiciona nan mas mihor den un mercado internacional cu cada biaha ta mas exigente.

Un punto importante ta cu e sistema lo wordo introduci poco poco, pa no pone presion innecesario riba empresanan chikito y medio (pagina 3). Pa esnan, ta proponi un modelo flexible manera “comply or explain”, pa facilita participacion amplio.

E marco ESG ta basa riba tres pilar principal:

Medio ambiente: proteccion di biodiversidad y uso sostenibel di recurso natural

Social: Bon condicion di trabou y contribucion na comunidad

Gobernacion: Transparencia, integridad y combate contra corrupcion

Ademas, e proposicion ta inclui creacion di un registro nacional di ESG pa colecta y centralisa informacion confiabel, y formacion di un taskforce nacional cu representantenan di gobierno y sector priva pa guia implementacion  .

Segun e documento, e impacto spera ta positivo: miho proteccion di naturaleza, mas confianza di inversionistanan, acceso na financiamiento sostenibel y un economia mas inclusivo .

Finalmente, Aruba Birdlife Conservation ta haci un yamada na gobierno, Parlamento y sector priva pa traha hunto pa haci e marco ESG realidad, den interes di generacionnan futuro.