Santa Rosa ta pidi uso responsible di awa di dam

ORANJESTAD - Departamento di Agricultura, Cria y Pesca (Santa Rosa) ta advirti cu awa di dam ta cabando pa motibo di falta di yobida, mientras demanda ta sigui halto pa calor y stof di Sahara. Pa esaki, entrega di awa lo wordo limita y productor nan mester usa e awa cu mas cuidado.

Actualmente tin solamente cuatro dam cu ainda tin awa (Tanki Leendert, Tanki Flip, Rooi Afo y Hooiberg), pero cu cantidad limita. Santa Rosa ta pidi pa usa awa di dam solamente pa agricultura y cria di bestia, y no pa otro uso.

Como alternativa, productor nan por solicita awa subsidia via WEB Aruba N.V. pa evita perde cosecha of falta awa pa bestianan. Tambe ta recomienda pa usa sistema di irrigacion eficiente y colecta awa di uso casero, manera di washmachine.

Santa Rosa ta haci un apelacion pa tur persona coopera y prepara pa temporadanan di sekura, esperando cu yobida lo yega pronto pa yuda yena e damnan.