Vd Sloot: Recompensa di 10 mil dollar pa mate den prison

LIMA – Den un carta dirigi na su casa, -cu cual el a casa cun’e den prison-, Joran van der Sloot a expresa temor pa su bida y a bisa cu tin un botin riba su cabes y cu nan kier mat'e den prison na Peru. “Mi no kier muri” van der Sloot a skibi su casa Leydi Figueroa, segun un carta skibi na man, cual e casa a comparti cu e canal di television Fox News Latino. Segun vd Sloot, e tata di e muher cu e la mata na Peru, Stephany Flores-, a ofrece e suma di $10.000 dollar pa cualkier hende cu mat'e den e prison Challapalca den e seronan di Andes.

TATA TA DESMENTI

Ricardo Flores ta desmenti e acusacion na Fox News Latino:” Joran ta un mentiroso patologico cu lo bisa cualkier cos pa mehora su condicion y haya loke e kier. Awor cu e no ta hayando su gana, e lo bisa cualkier cos pa e wordo transferi na un localidad mas suave”. Segun Joran su version, “e prizoneronan di Challapalca ta kere cu si nan mata mi, e prison di maximo seguridad lo wordo sera”. Mi ta roga e autoridad pa tuma accion prome cu ta laat y cu sanger wordo derama, cu tur respet” su carta ta sigui bisa.

ASESINATO DI FLORES

E asesinato di Flores a sosode practicamente 5 aña di e dia cu vd Sloot a wordo mira ultimo biaha cu e dama mericano Natalee Holloway ,-cu e ta wordo sospecha di su posibel morto na 2005-, y cu for di e momento ey e dama a disparce y no a wordo localisa nunca mas. Mientrastanto a declara Holloway legalmente morto.

Vd Sloot ta sintando un castigo di prison di 28 aña pa morto di Flores. E la casa mientrastanto, y nan tin un yiu di 11 luna. E ta skibiendo un buki awor di cual un capitulo ta dedica na Natalee Holloway.