“Wega Ariba Wiel” ta bay bario: adulto mayor lo haya actividad fisico mas cerca di cas

ORANJESTAD  – Un proyecto piloto nobo, “Wega Ariba Wiel” (WAW), ta cuminsa pa adulto mayor cu meta pa mantene nan activo y mas involucra den actividad fisico den nan propio bario. Asina minister di Deporte Gerlien Croes a anuncia. 

E programa lo dura dos luna y ta cuminsa dia 4 di mei. Un di e cambio mas importante ta introduccion di dos unidad movil (WAW mobiel), cu lo bay directamente den barionan pa ofrece actividad di movimiento y recreacion mas accesibel pa comunidad.

E unidadnan movil lo sigui un schedule cu lo wordo publica pronto, pa clubnan, grupo y personanan individual por sa unda y ki ora e actividadnan ta tuma luga. E iniciativa lo inclui tambe actividad pa mucha y hoben den algun bario.

“Wega Ariba Wiel” no ta un concepto nobo; anteriormente e ya a mustra resultado positivo den diferente comunidad, principalmente pa hoben. Awor, cu e expansion pa adulto mayor, e programa ta busca amplia su impacto.

Despues di e fase piloto, lo evalua resultado pa mira si e proyecto por wordo amplia na mas districtonan.

Personanan interesa por haya mas informacion y e schedule via IBiSA of riba website actividad.aw.