Scolnan ta sera dialuna na St Maarten en espera di horcan Danny

PHILIPSBURG – Scolnan na St Maarten ta sera dialuna awor como precaucion pa yegada di horcan Danny. Asina e corant Daily Herald di e isla ta raporta. Prome minister Marcel Gumbs, cu ta presidi e asina yama Emergency Operations Center (EOC), a tuma e decision despues di tuma nota di e pronostico di diabierna. E pronostico ta mustra cu pa dialuna Danny lo ta drentando e region di e.o. St Maarten. A splica durante un discurso nacional radial diabierna, pa tur hende tene cuenta, prepara, y scucha e noticianan di e tempo. Ta spera awacero torencial cu por conduci na inundacion di cayanan y seronan. “Scol ta sera dialuna augustus 24 como precausion” Gumbs a sigui bisa. A cuminsa haci limpiesa di rooi y otro posibel caminda, pa laga caminda liber pa awa pasa. Negoshinan ta dicidi den weekend si ta sera dialuna. A haci peticion pa asistencia militar tambe.

UBICACION DI HORCAN DANNY

Awe tardi 5'or, e centro di horcan Danny tabata ubica na 14.5 N y 49.1 W. Danny ta moviendo direccion west nort west, cu velocidad di 17 km pa ora y ta sigui e patronchi por lo pronto te cu diasabra.  Un buelta den direccion west ta pronostica pa diasabra anochi. Biento sosteni ta di 185 km, y ta pone na un horcan categoria 3. Ta pronostica cu ora cu e drenta proximamente den e cuenca di isla caribense, cu e lo por perde poco forza. 

NOTA: Foto di horcan Danny ta tuma for di e Stacion Espacial Internacional.