Ta lansa Shark Week Aruba di 22 te cu 29 di augustus

ORANJESTAD  - Un plataforma cu ta inclui diferente organisacion y persona, ta lansa e proyecto “Salba nos Tribon” cu un Shark Week (siman di tribon) sumamente interesante na Aruba. E organisacionnan envolvi ta entre otro Parke Nacional Arikok, Directie Landbouw, Visserij en Veehouderij (Santa Rosa), Directie Natuur en Milieu, Hadicurari, Aruba Reef Care, Dutch Caribbean Nature Alliance y Biblioteca Nacional.

Den opdracht di Dutch Caribbean Nature Alliance y financia door di Nederlandse Postcode Lotterij, e proyecto “Salba nos Tribon” lo tin un duracion di 3 aña. Lo traha hunto cu piscadonan, sambuyadonan, expertonan y nos comunidad pa yega na e meta pa conscientisa pueblo di Aruba di e importancia di nos tribonnan. Tambe lo genera data cientifico di nos tribonnan y finalmente proteha nan populacion den lama di Aruba. Shark week ta core di 22 te cu 29 di augustus y ta yena cu varios actividadnan.

Diasabra 22 di Augustus: Ta cuminsa pa 7 or y mei di anochi, cu un “discussion panel” yama “Ban papia di nos Tribonnan” na e centro di bishita di Parke Arikok. Pa habri e discusion di tribon na Aruba nos ta invita tur piscado, sambuyado y hend’i lama. E motibo specifico pa nos invitacion, ta pasobra sambuyado y hend’i lama tin conocemento amplio tocante nos bida marino.

Diadomingo 23 di Augustus: Pa 8 or di mainta te cu 12 or di merdia na Aquawindie’s Dive Center lo tin un di dos module di e programa Junior Ranger unda muchanan lo siña tocante nos rifnan y con tribon ta importante pa mantene e rifnan. Ademas lo transporta e muchanan pa Boca Catalina unda nan por bay snorkel y disfruta di nos bida marino.

Exposicion: Henter e siman lo tin un exposicion chikito na centro di bishita di Parke Arikok. Ademas lo tin tayernan pa muchanan artistico y motiva cu kier yuda pinta un bunita Mural hunto cu nos artista local Robert Tromp. Kooyman ta apoya nos door di sponsor pintura y materialnan pa e actividad aki. Lo expone e Mural riba diabierna 28 di Augustus pa 7 or di anochi, unda henter publico ta invita pa bin admir’e na Jads Dive Center na Seroe Colorado, San Nicolas.

Movie night: Na final di e siman, diasabra lo tin un movie night cu e tema di Tribon cu ta tuma luga pa 7 or y mey di anochi na centro di bishita di Parke Nacional Arikok.

Nos ta invita comunidad di Arubiano henter pa bin disfruta di e actividadnan unico y hopi interesante di Shark week. Bin apoya nos tribonnan cu ta esencial pa nos bida marino!

Pa mas informacion por tuma contacto cu Parke Nacional Arikok na tel: 585 1234, ext. 226 of cell. 562-9348