Aruba y Corsou ta mas resistente economicamente pero cu debilidad structural

ORANJESTAD – Aruba y Corsou ta conta entre e paisnan mas resistente economico den Caribe, pero na mes momento nan ta enfrenta debilidadnan structural. Sint Maarten, sinembargo, ta conta entre e economianan mas vulnerable den region. Esaki ta resulta di un investigacion comparativo nobo di Economisch Bureau Amsterdam.

Den e asina yamada “Resilience Index Caribbean”, unda 18 pais ta wordo compara riba nan resistencia contra shock economico, Aruba y Corsou ta termina respectivamente na posicion cinco y seis. Tur dos pais ta score relativamente bon riba factor manera calidad administrativo, finanza di gobierno y posicion geografico, entre otro paso cu nan no ta situa den zona di orcan.

Sinembargo, e raporta ta mustra vulnerabilidadnan cla. Tanto Aruba como Corsou ta score abou di promedio regional riba participacion laboral y desarrollo demografico, manera envejecemento y salida di habitantenan. Tambe sostenibilidad ta atras, cu emision relativamente haltu di CO2 pa habitante y uso limita di energia renovabel.

REGIONNAN ABOU

Sint Maarten, por otro banda, ta situa den e regionnan abou di e index. Segun e investigadornan, e economia ta mas vulnerable pa shock externo, entre otro pa dependencia fuerte di importacion y turismo. Tambe su posicion den zona di orcan y indicadornan demografico mas debil ta baha e score. Riba nivel institucional y financiero, Sint Maarten ta performa un poco miho.

E index ta combina 26 indicador, variando for di structura economico y finanza di gobierno te riesgo climatico y demografia. Cu esaki, investigadornan kier duna un bista mas amplio di resistencia economico cu no solamente crecimiento of entrada.

Segun e autornan, e comparacion ta mustra cu institucionnan fuerte y finanza solido di gobierno no ta suficiente pa absorbe shock economico. Factornan structural manera mercado laboral, migracion y sostenibilidad ta hunga un rol cada biaha mas grandi den estabilidad di economianan chikito di isla.