Campaña riba introduccion di parkeermeters a cuminsa

ORANJESTAD – E parkeerwachtersnan (personal cu lo atende proximamente cu e parkeermeters) a cuminsa haci nan trabou di concientisacion di e proceso awe. Nan ta repartiendo flyers, y dunando informacion na comunidad. “Si un di boso cu por tin cualkier pregunta di e servicio nobo aki, cual lo cuminsa pronto den centro di Oranjestad” vocero di Arubus cu ta opera AruParking, Sanin Daou a bisa awe mainta. “ Nan ta riba caya repartiendo flyers y dunando informacion. Si bo tin cualkier pregunta bo por acerca cualkier di nan libremente y asina nan por dunabo e informacion corecto mesora” Daou a bisa finalmente.

INTRODUCCION 1 SEPTEMBER

Prome di september ta e fecha cu lo introduci e parkeermeters, segun minister di transporte Otmar Oduber. Falta algun ley cu tin cu wordo pasa ainda, cu ta pega na Raad van Advies. Pero ta spera cu pronto esaki tambe por keda cla. E mandatario no ta considera e introduccion di e parkeermeters como un medida, sino un alivio pa comunidad. A compara e situacion cu otro partinan na mundo cu ya caba ta custumber cu ta paga pa parkeer, y cu tin sumanan mucho mas halto pa ora.

E LEY DI PARKEER

Despues di un retraso di casi 7 luna, e ley di parkeermeter y parkeervak, a pasa na juli ultmo, cu ta nifica cu e parkeermeternan por drenta den funcion aworaki. E cantidad di voto pro tabata 11 mientras cu 5 a vota contra, ta wordo trata porfin diaranson mainta den parlamento. Inicialmente, -y manera NoticiaCla.com a raporta recientemente ainda-, e ley mester a wordo trata despues di reces, pasobra no tin espacio prome. Sinembargo pa sorpresa, e vice presidente di parlamento Chris Dammers a confirma na NoticiaCla.com diamars mainta cu a dicidi toch, pa pone e tratamento riba agenda pa 8’or diaranson mainta trempan. Pero e motibo principal ta cu a bin un ‘buraco’ liber diripiente debi cu un otro ley no a keda cla.