MEP: Preguntanan pa minister relaciona cu fayecimento di turista Venezolano

ORANJESTAD – Tumando nota di e noticianan rond di morto di e venezolano cu recientemente a fayece, fraccion di MEP a manda un lista di pregunta pa minister di husticia Arthur Dowers riba e tema. Fraccion di MEP tabata kier haya claridad riba e asunto a hasi diferente pregunta specificamente relaciona cu e investigacion. “Nos ta spera cu e minister en cuestion por sali afor informa pueblo y familiarnan por ta mas trankil” e fraccion ta bisa den un comunicado. Ta trata di tres pregunta, cu ta varia entre 'si e minister conoce articulonan di prensa cu ta contradeci otro riba e suseso, si tabatin investigacion riba e detencion y encarcelacion di e persona, y si e investigacion aki a conduci na cambio den e maneho di stranhero'. 

E NOTICIA LAMENTABEL

Segun e fraccion, manera ta conoci comunidad di Aruba a wordo sacudi cu e noticia unda cu un hoben studiante Venezolano a wordo haya morto den su cel na "Huis van bewaring" dia 3 augustus. Segun informe obteni e hoben su status tawata uno ilegal y te cu dia ey no a haya un contesta concreto kico ta e motibo di su morto. E fraccion ta mustra cu despues a sali den prensa dia 6 augustus cu aparentemente e hoben Venezolano lo a fayece di stikmento. Familiarnan a laga sa via di prensa cu lo tin duda riba e parti suicidio. (lesa e carta y preguntanan original manda, aki). 

KEHO DI MAYORNAN

Tabata e siman aki cu NoticiaCla.com a raporta. Pa mayornan di José Gregorio Javier Bullones, esta América Bullones y Raúl Javier, y su tionan Irma Bullones de Ortega y Fredy Ortega, e morto di nan yiu na Aruba ta uno straño y nan ta exigi un investigacion. Bullones (25) ta e venezolano illegal cu a wordo haya gestik cu papel di WC den su ‘cel’ na Huis van Bewaring recientemente. Su curpa mientrastanto ta bek na su ciudad natal Duaca, estado Lara, pero e preguntanan ta hopi ainda. Ministerio Publico su investigacion ta sigui, pero vocero Ann Angela no por a confirma si e famianan a tuma contacto cu OM riba e caso aki. “Mi por confirma solamente cu e caso ta den pleno investigacion ainda”.

PENSAMENTO DI MAYORNAN

Pa loke ta e studiante fayec’i na Aruba, e mama no tin palabra di consuelo. Den un declaracion cu prensa venezolano e siman aki, e ta bisa “ Mi yiu tabata un bon mucha, un bon yiu, bon studiante, amoroso, un bon yiu”. Na palabra América Bullones cu awa na wowo, segun e raportahe. “Dunami hopi bendicion mama” tabata e ultimo palabra na su mama, prome cu ela biaha pa Aruba. E plan tabata pa descansa algun dia na Aruba pa despues bolbe cu mas forza y continua cu su estudio di ingenieria, cu e kier a caba otro aña.

HOBEN CONVERSADOR

“Ora cu mi bolbe, nos lo sigui papia riba nos proyectonan, cu ta bay bin” e yiu lo a sigui bisa su mama. E mama ta cord'e como un hoben hopi conversador cu tabata ilusiona ora e papia di su plannan, y hunto cun'e, su tata, su tanta Irma y su prometida Carolina Becerra. “Su morto a kibra mi curazon, sigur pa lo straño cu e loke a sosode”.

EXIGI INVESTIGACION

Mas straño ta cu nan a wordo notifica apenas diaranson siguiente, siendo cu Jose a muri for di diadomingo, segun e relato ta bisa (e homber a muri dialuna mainta, segun informacion oficial na Aruba: red). Jose mester a yama su mama diadomingo, pero e yamada nunca no a bin. Un precupacion cu tabatin ta cu nan lo no a devolve e curpa pa Venezuela pa crema esaki. Nan no ta descarta cu lo exigi un investigacion pa haya sa kico a sosode di berdad. “Pasobra mi yiu no a comete suicidio. E no tabatin motibo pa haci tal” e mama a bisa. E la recomenda mesora pa ningun hende biaha pa Aruba. NOTA: Foto cortesia www.elimpulso.com.