Aruba ta firma dos protocol maritimo clave pa reforsa siguridad y cooperacion internacional

ORANJESTAD -  Aruba a participa activamente den un conferencia maritimo riba nivel di Reino Hulandes na Sint Maarten, unda Minister Wendrick Cicilia tabata presente. Durante e encuentro, a firma dos protocol importante pa fortifica cooperacion y manejo di asuntonan maritimo den Reino.

E prome protocol ta fortalece colaboracion entre departamentonan maritimo pa intercambia conocemento y experticio, algo crucial pa Aruba considerando su dependencia di turismo di crucero y importacion. E di dos ta un acuerdo cu Onderzoeksraad voor Veiligheid pa investigacion di accidentenan maritimo, cu ta permiti cooperacion entre experto local y hulandes.

Ademas, Aruba ta traha riba preparacion pa audit internacional y riba desaroyo di legislacion local pa cumpli cu regulacionnan di International Maritime Organization, cu meta di garantisa mas siguridad den awanan territorial.