Diamars gobierno lo anuncia maneho pa steps y scooters na Aruba

ORANJESTAD – Gobierno di Aruba lo presenta  un maneho nobo diamars pa steps y scooters riba caminda publico, despues cu preocupacion tocante e uso descontrola di e vehiculonan aki a sigi crece den diferente barrio y riba diferente caminda di nos isla. E anuncio a wordo confirma pa minister di Husticia, Arthur Dowers, unda cu e la laga cla  cu gabinete actual ta mira e situacion como un asunto serio cu no por sigui wordo laga bai asina.

Segun Dowers, e problema cu steps y scooters no ta algo cu a sali awe pa prome biaha, sino un situacion cu gobierno a haya caba cu a wordo laga acumula durante tempo. E mandatario a bisa cu, “nos ta constata no di awor,” y cu hopi asunto “gobierno a laga bai.” E la mustra su frustacion cu e falta di accion di aña pasa, y a enfatisa cu ora un partido drenta gobierno, e tin obligacion pa goberna y tuma medida, no pa laga problema continua sin control.

Un di e puntonan cu minister Dowers a menciona  specificamente ta e uso di steps riba caminda publico, unda, segun  e, gobierno ta trahando caba riba un sistema di sancion y control mas firme.  

BROMMER

E ministro a laga compronde cu e asunto no ta limita solamente na incomodidad of desorden, pero cu tin tambe un dimension serio di seguridad publico. E la bisa cu den ultimo tempo gobierno a nota situacionnan “riba caya” unda personanan cu brommer “ta hasi un desastre,” y ainda “ta terorisa cierto barrio nan, cierto hende nan.” Segun Dowers, tin residentenan cu ta sinti nan mes spanta pa e forma imprudente y peligroso cu algun usuario ta circula, creando situacionnan di riesgo pa peatonnan, motorista, chauffeur y tambe pa nan mes.

Dowers a admiti cu actualmente tin limitacionnan den loke ta e marco legal pa trata cu tur e tipo di conducta aki, pero e la subraya cu tambe tin otro instrumento legal cu por wordo usa pa actua mas duru. “Nos no tin suficiente lei pa atende cu nan,” e la bisa, pero a sigui splica cu tin “extra aspectonan di lei, caminda cu bo por actua ainda mas severo contra di tipo di cosa aki.” Cu otro palabra, gobierno ta buscando no solamente regla nobo, pero tambe con pa aplica ley existente cu mas rigor.

Pa Dowers, e momento a yega pa gobierno manda un señal fuerte na comunidad. “Nos no ta bai keda tolera e cosnan aki,” e la declara, insistiendo cu Aruba, como un pais chikito cu hopi hende biba pega cu otro, tin mester di mas orden y respeto riba caminda publico. Segun e , pa tur hende por biba den tranquilidad, mester tin regla cla y comportacion responsable di parti di cada usuario di via publico.

E conferencia di prensa di diamars lo sirbi pa splica con e maneho nobo lo traha, cua sancionnan por wordo aplica, y con gobierno kier atende e problema di e-steps y scooters cu ta circula sin control riba caya. Te cu awor, loke minister Dowers a laga cla ta cu gobierno finalmente ta move pa tuma accion concreto riba un asunto cu, segun hopi ciudadano, a dura demasiado tempo sin direccion cla.