Minister ta duna encargo di enseñansa directo sin proceso publico

Minister ta duna encargo di enseñansa directo sin proceso publico

Posted on 04/16/2026 9:06 am AST | Updated on 04/16/2026 9:26 am AST

ORANJESTAD – Gobierno di Aruba a otorga varios encargo pa desaroyo di material didactico den enseñansa sin pasa door di un destaho publico pa escoge proveedor. Esaki a sali na cla for di disposicionnan ministerial publica recientemente den e Landscourant, segun e portal aruba.nu . E encargonan, cu cantidadnan cu ta subi te mas di 180.000 florin arubiano, ta forma parti di un proyecto mas amplio pa desaroyo di metodonan di enseñansa pa Hulandes y Papiamento den enseñansa primario. Den varios caso, ta trata di encargonan rond di 83.000 florin. Minister di Enseñansa y Deporte, G.L. Croes, lo a tuma decision pa no aplica e proceso comun di selecta un proveedor. Pa esaki, a haci uso di un disposicion di excepcion cu ta permiti pa duna encargo directamente ora tin conocimiento specialistico of ora no tin proveedor alternativo disponible.

Segun e disposicionnan, e situacion aki ta aplica, entre otro pa motibo di escasez di expertisio y e necesidad pa mantene continuidad den e proyecto. E uso di e regla di excepcion aki ta permiti dentro di legislacion na Aruba y mester wordo motiva y publica, manera a sosode den e caso aki via publicacion den e Landscourant. Cu esaki, ta busca pa garantisa transparencia.

Loke ta destaca, sin embargo, ta cu e excepcion a wordo aplica varios biaha den mes proyecto di enseñansa y pa diferente encargonan. E decisionnan a wordo tuma na cuminsamento di maart y ta forma parti di un proyecto cu ta cofinancia cu medio di Hulanda. E gastonan inicialmente ta wordo cubri pa Aruba y despues lo wordo compensa ora subsidio wordo ricibi.

Te ainda, ministerio no a duna mas splicacion riba con a determina cu no tin proveedor alternativo disponible, ni te ki punto mercado a wordo explora.

  • Powered by SETAR