Wever-Croes ta rechasa HOFA: No ta e mesun version cu a firma na 2024

ORANJESTAD – Durante un reunion den Parlamento cu Secretario di Estado Eric van der Burg, lider di fraccion di MEP Evelyn Wever-Croes a expresa fuerte oposicion contra e ley di reino HOFA.

Segun Wever-Croes, aunke e ley por trece bentaha di paga menos interes, e riesgo principal ta cu e lo frena crecemento socio economico di Aruba. El a enfatisa cu e efecto negativo di e ley por ta mas grandi cu cualkier beneficio financiero.

E la señala cu HOFA a wordo firma door di gobierno anterior, pero cu MEP lo sigui lucha pa evita cu e ley aki bira realidad. Durante e reunion, segun Wever-Croes, a surgi informacion adicional cu gobierno no tabata comparti, loke ta yuda determina e proximo paso.

Wever-Croes a conclui cu nan lo continua haci maximo esfuerso pa proteha interes di Aruba y preveni implementacion di HOFA.