VIDEO: Van der Burg ta keda firme riba HOFA incluyendo cambio pa fondo di inversion pa Aruba

ORANJESTAD – Den medio di presion politico creciente na Aruba pa cambia fundamentalmente e contenido di e Ley di Reino HOFA, secretario di estado hulandes Eric van der Burg a confirma cu Hulanda ta keda firme riba su posicion: no tin espacio pa cambio esencial, ni pa converti debe di Aruba den un fondo di inversion. Durante su bishita mas recien na Aruba, Van der Burg a wordo confronta directamente cu e dos punto clave aki den un entrevista exclusivo cu periodista Tito Laclé di Noticiacla. E mandatario a wordo puntra si su postura a cambia, considerando cu gruponan politico local ta sigui insistí riba revision di HOFA y un modelo alternativo pa debe cu Aruba tin cu Netherlands. E respuesta di Van der Burg ta confirma un linea consistente cu su antecesornan. Desde cu gabinete anterior di Aruba a firma pa inicia proceso di HOFA, varios secretario di estado hulandes a pasa riba e puesto, pero tur a mantene mesun posicion.

Mescos ta aplica pa e propuesta di transforma e debe di COVID di Aruba den un fondo di inversion. Lider politico na Aruba Mike Eman ta mira esaki como un oportunidad pa stimula crecemento economico. Hulanda ta pensa otro. E declaracion aki ta cay den un momento sensitivo, unda debate riba autonomia, supervision financiero y relacion den Reino ta bira cada vez mas intenso. Pa hopi, HOFA ta representa un limitacion riba autonomia; pa Hulanda, e ta un instrumento necesario pa sigura disciplina financiero.

E entrevista completo, unda Eric van der Burg ta contesta sin dal buelta riba e dos tema clave aki, lo wordo transmite awe anochi pa 8’or y mei riba Facebook y YouTube di Noticiacla.

E publico lo por tende directo con firme Hulanda ta para riba e dos asunto cu ta centra e discusion politico actual na Aruba.