AZV: Preocupa cu cantidad grandi di zorgpas cu mester renoba ainda

ORANJESTAD – Uitvoerings Orgaan Algemene Ziekte Verzekering (AZV) ta precupa cu e cantidad grandi di persona cu ainda no a renoba na Zorgpas e aña aki. Vocero di AZV Solange Tchong a splica cu mientras cu nan ta contento cu e grupo (33150) cu si a pasa cambia di nan, e grupo grandi di 24632 cu ainda falta, ta preocupa nan. Y si mira patronchi actual di asegurado cu ta bin pa dia (235), e no ta bay ta suficiente pa keda cla ora cu aña 2015 termina.

CANTIDAD CU TA BIN

Segun Tchong, pa brinda un servicio rapido na cada cliente y pa evita rijnan largo, AZV a conta riba un cantidad di 335 asegurado cu pa dia mester presenta na AZV pa renoba nan ZorgPas. “Actualmente nos tin un promedio di 235 asegurado pa dia; esta 100 hende menos di loke a spera. Esaki ta nifica cu si sigui riba e ‘pace’ aki, un cantidad di 7300 asegurado lo lamenta na final di aña ora cu luna di november of december drenta” Tchong a bisa. Esey ta nifica cu e ora ey si lo kier yega AZV y wordo yuda rapidamente. Sin embargo, lo por wordo confronta cu un drukte cual honestamente e cliente mes por a evita si a percura pa reacciona riba e invitacion di AZV mesora y no warda te ultimo.

Un biaha mas, nos di AZV ta haci apelacion na cada asegurado cu mester renoba ZorgPas pa percura pa haci esaki.