Hulanda kier caba cu acceso desigual na fondo europeo pa islanan caribeño

ORANJESTAD – Hulanda kier pa e cooperacion entre Union Europeo y e islanan caribeño cambia fundamentalmente. Durante e OCT-EU Forum na Aruba, secretario di estado Eric van der Burg a boga pa un acercamento unda e area mas chikito por haña mihor acceso na fondo europeo.

Segun Eric van der Burg, sistema actual no ta traha suficiente pa islanan cu capacidad limita pa ehecuta proyectonan. Aunke paisnan y territorionan formalmente ta igual den cooperacion, den practica ta dificil pa islanan mas chikito logra acceso exitoso na fondo europeo. Nan mester hopi biaha competi cu consorcionan europeo grandi y no tin mesun capacidad pa presenta aplicacionnan compleho.

P’esei cooperacion mester wordo organiza diferente. Hulanda kier cu Union Europeo involucra mas tempran den proyectonan, pa planonan no wordo evalua solamente na un fase hopi laat. Tambe mester tin mas espacio pa solucion personalisa y apoyo, pa proyectonan conecta mihor cu necesidadnan di e islanan.

E secretario di estado a enfatisa cu cooperacion no mester bini solamente for di Europa. Segun  e, e islanan tambe ta trece conocemento y rednan cu tin balor pa Union Europeo. Door di usa e forsa mutuo mas eficaz, planonan mester wordo converti mas rapido den resultado concreto.

E yamada aki ta marca un cambio cla di rumbo: for di igualdad formal pa un cooperacion mas practico cu ta tene cuenta cu diferencia entre area grandi y chikito.