MJF: Tur Banco lo ta presente na Turn up the Pink fundraising event!

ORANJESTAD - Tur cuater banco esta Aruba Bank, CMB, Banco di Caribe y RBC Bank a confirma nan presencia diadomingo awor 23 di augustus na Mary Joan Foundation su actividad pa recauda fondo pa asina mantene e fundacion su portanan habri. Esaki ta pa facilita tur esnan cu ta desea di contribui cu un standing order na MJF. Por pasa libremente na e tent di bo banco di preferencia pa asina hasi bo donacion. Flexibilidad di standing order ta cuminsa na AWG 10.00, AWG 15.00, AWG 20.00, AWG 25.00 y pa esnan cu ta desea di duna algo mas cu e sumanan menciona semper ta welcome.

DETAYES DI EVENTO

“Turn up the Pink” fundraising event lo cuminsa fei di 8or di mainta y lo termina pa 8or di anochi y lo tuma lugar na Entertainment Center na Dakota. Mary Joan Foundation kier gradici tur cuater banco cu mes ora a confirma nan asistencia pa yuda facilita cu Aruba su poblacion generoso por hasi nan donacion. Cada granito ta yuda Mary Joan Foundation sigui existi. Aruba nos di MJF ta conta cu boso sosten. Hopi ta e voluntarionan cu lo duna di nan tempo pa e actividad aki y Mary Joan Foundation kier gradici e empleadonan di banconan pa nan contribucion riba e dia aki. Pa mas informacion por tuma contacto cu nos na 588-9999, pasa na nos oficina na Sabana Blanco #8 of por like nos Fb Page – Mary Joan Foundation Aruba.