Lo dicidi riba inmunidad politico di Carvajal mas laat

ORANJESTAD – Diabierna atardi hues comisario van Wersch lo dicidi si e ex general Hugo “El Pollo” Carvajal lo recobra su libertad of ta keda deteni. Su status diplomatico ta wordo cuestiona. Un ora despues di cu van Wersch a atende cu e detenido, e la indica cu e ta tuma su tempo pa yega na un decision. “Mi no sa si e ta keda deteni. Mi kier analisa esaki den tur trankilidad” e hues comisario a declara na NoticiaCla.

Ora cu e hues comisario tuma su decision, e ta avisa Ministerio Publico y e defensa di Carvajal, esta abogadonan Chris Lejuez y Vinda de Sousa. E motibo di e ‘tardansa’ segun van Wersch, ta cu ta trata di caso dificil cu ta rekeri un decision dificil. “E pregunta mas importante cu mi tin cu contesta, ta si e persona ta disfruta di inmunidad diplomatico of no. Y si esey ta e caso, e no por keda deteni mas largo”. Si hues comisario dicidi cu e no ta disfruta di inmunidad politico, e por keda deteni mas largo. E hecho cu presidente di Venezuela ta imponiendo presion riba Aruba pa laga e ex general den libertad, no ta precupa van Wersch “ Mi no ta laga mi mes wordo poni bou di presion” e la sigura NoticiaCla. “ Ta un cuestion si e ta legal of no. Punto”, e hues comisario a finaliza bisando.