Parlamento ta trata ley A.F.T. otro siman diahuebs

ORANJESTAD – E reunion publico pa trata e ley di supervision financiero di Aruba AFT, ta planea pa tuma lugar dianan 27 y 28 (si ta necesario) di augustus proximo. Awor cu e ley a drenta parlamento, presidente di parlamento Marisol Lopez Tromp por a schedule e reunion pendiente. Cu bista riba esaki, parlamentarionan a wordo informa cu nan tin te dialuna proximo pa haci nan preguntanan necesario. Esey a keda dicidi dialuna ultimo durante e reunion di Comision Central den cual tur lider di fraccion a expresa nan puntonan y desicionan a cay. Intencion ta pa esaki keda cla prome cu fin di augustus, y sigur prome cu e proximo reunion di conseho di minister di Reino dia 4 di september. Durante e reunion ey, lo evalua e progreso cu Aruba a haci riba e tereno aki.

E LEY A DRENTA PARLAMENTO. 

Tabata dialuna mainta cu e concepto di ley Aruba Financieel Toezicht (OLV AFT) a drenta parlamento. Riba e mesun dia tambe ta dia cu parlamento a bolbe di reces (juli 7-aug17). Mientras cu e fecha (segun protocol firma dia 2 di mei ultimo) tin e fecha di 1 di augustus 2015 poni pa e ley drenta na vigor, awor numa e ley lo wordo trata. Gobierno a mustra caba (y ta poni den e ley), cu e ta drenta na vigor pa e fecha menciona, pues ‘no ta violando ningun protocol’. Tur parlamentario a ricibi esaki, pero no ta conoci ki dia e ley lo wordo trata awor. Esey ta pasobra tin un cantidad di reunion planea caba den e proximo 2 simannan. Y no por a confirma si e reunionnan ey lo wordo poni un banda pa trata esun di AFT prome.

TRAYECTORIA DI E LEY

Manera ta conoci, e ley tin cu cana su caminda, cu ta ensera entre otro tratamento di esaki den un comision central, pa despues manda pregunta pa minister, y warda contesta. Tambe e parlamentarionan mester haya chens pa prepara nan mes pa e ley aki. Ta premira den e proximo 2 simannan cu e ley por wordo poni riba agenda pa wordo trata.

HULANDA RMR

Mientrastanto gobierno di reino hulandes a informa NoticiaCla.com recientemente cu nan ta dicidi y trata e asunto aki dia 4 di september, cu ta e prome reunion di conseho di minister di Reino despues di reces. “Nos lo wak si Aruba a cumpli e ora ey, y si el (drenta na vigor cu forza retroactivo) a funciona”. E ley mes ta conta cu  un total di 19 pagina, (lesa e ley aki). Lesa aki e conseho di Raad van Advies. Lesa aki e contesta di gobierno riba conseho di RvA. Lesa aki e Memorie van Toelichting riba OLV AFT.