Wingo ta lansa ruta temporal entre Aruba y Barranquilla

ORANJESTAD – Aruba lo tin un conexion aereo directo cu Barranquilla dor di un ruta temporal nobo opera pa Wingo. Asina aeropuerto di Aruba a confirma diahuebs mainta. E ruta lo conecta Aruba cu Colombia via Aeropuerto Internacional Ernesto Cortissoz.

E servicio lo cuminsa dia 9 di juli y lo opera durante temporada halto cu dos vuelo semanal, riba diahuebs y diadomingo.

E conexion nobo ta amplia opcionnan di biahe pa residentenan di Aruba y ta facilita e yegada di bishitantenan for di Colombia. Tambe lo crea oportunidadnan tanto den turismo como den actividad comercial.

E introduccion di e ruta ta forma parti di un ampliacion di conectividad regional, cu ta busca pa haci Aruba mas accesibel dentro di mercado Latinoamericano.