Hospital di Aruba no a wordo afecta pa atake ransomware na ChipSoft

ORANJESTAD – E atake di ransomware riba e compania di software Hulandes ChipSoft no a tin consecuencia te awor pa Horacio Oduber Hospital na Aruba. Asina director di hospital, Jacco Vroegop, a confirma na un medio di comunicacion. Segun Vroegop, hospital actualmente ta sinti “casi ningun molester”. Hospital ta host su sistemanan localmente via e compania di telecomunicacion local Setar y no ta conecta directamente cu ChipSoft via un conexion externo. “Esaki ta haci cu nos practicamente no ta haya molester y nos mes tin nos propio medida di seguridad,” e la bisa. Tambe, segun hospital, ChipSoft mes a indica cu ningun hospital no a wordo afecta pa e atake. Sinembargo, contacto entre hospital y e proveedor di software ta sigui intenso pa monitorea e situacion. E atake ta principalmente un problema pa e proveedor mes y no directamente pa institucionnan di salud, aunke e incidente ta mustra cu sector di salud ta dependiente di sistemanan digital.

CORSOU

E dependencia aki tambe ta hunga un rol den region. Na Curaçao, Curaçao Medical Center  (CMC) ya ta traha cu e sistema electronico di paciente HiX di ChipSoft. Bonaire ainda ta usa otro sistemanan y no ta conecta ainda. E situacion ta mustra cu digitalisacion di salud den Caribe ta aumenta, pero manera con sistemanan ta wordo configura, manera hosting local, por determina con vulnerable nan ta na incidente cibernetico.