RHD: No ta acepta ningun tipo di discriminacion for di car dealernan local

ORANJESTAD - Fundacion RHD Community Aruba no ta acepta ningun tipo di discriminacion for di car dealernan local. Den un comunicado diaranson anochi fundacion Right Hand Driver Community Aruba a mustra su desaprobacion pa un aviso di un agencia di auto aki na Aruba. E fundacion ta considera e aviso (propaganda) como discriminatorio.

DERECHO RHD

Segun e presidente di e fundacion, Cristian Soto-Garcia a mustra cu desde su inicio a lanta cu un meta, cual ta pa defende derecho di tur doño of futuro doño di autonan Right Hand Drive (RHD) aki na Aruba. Recientemente a tuma nota di un entrevista/propaganda cu a ser haci pa e dealer di Toyota na television, caminda a expresa di ta duna e servicio/producto di promocion solamente si e auto ta Left Hand Drive (LHD).

DISCRIMINACION

Un expresion asina por ser interpreta discriminatorio, segun Soto-Garcia mirando e echo cu apart di e lugar unda e stuur ta poni, no tin ningun tipo di aspecto tecnico cu ta diferencia autonan LHD for di RHD. Locual si ta notabel, ta cu autonan importa RHD tin como standard tur safety features cu autonan LHD ofreci riba mercado local no tin y por ser haña solamente si paga extra pe. Fundacion RHD Community Aruba ta condena e actitud aki y ta haña bergonsoso e mentalidad capitalista di un Arubiano pa cu un otro Arubiano. Mester tuma bon nota cu mayoria RHD importa for di Japon (+/- 60%) ta marca Toyota. Pa e motibo aki, fundacion RHD lo tuma e pasonan necesario pa entrega un keho pa discriminacion na e Corporacion Global di Toyota situa na Japon (ironicamente).

PRINCIPIO

Toyota Corporation su principio: The Toyota Way is supported by two main pillars: "Continuous Improvement" and "Respect for People". Un principio cu ,segun Soto-Garcia, e dealer local no sa di respeta. Sin laga afo: "Toyota doesn't put a label on vehicles which says "Made in The USA" or "Made in Japan", but instead opts for one label for all: "Made by TOYOTA". Wak e comercial aki.