Lo envolvi parlamento den desicion riba posibel reapertura refineria

DEN HAAG – Gobierno lo envolve parlamento den desicion di posibel reapertura di refineria Valero. Asina prome minister Mike Eman a bisa for di Hulanda, na final di e prome dia di reunion entre gobierno hulandes y di Aruba riba e.o. e tema di reapertura di e refineria. Ademas a mustra cu e motibo cu a bay Hulanda pa trata e tema, ta pasobra gobierno di Aruba kier un bon conseho. “Nos kier pa Reino sigui sostene nos cu conocemento tecnico y experticio den tuma e decision aki. Con cu bay bin e ta un decision cu tin consecuencianan grandi pa futuro di nos isla.”, Eman a bisa.

AYUDO DI HULANDA TA NORMAL

Segun Eman, no ta nada straño cu nan a acudi na Hulanda pa e tema aki. Discuti e tema aki cu mandatarionan Hulandes pa Eman ta algo masha normal. “Actualmente ta asina cu mas y mas paisnan ta traha hunto riba temanan grandi manera medio ambiente y durabilidad. Experticio di Hulanda pa traha analisis y calcula riesgonan di siguridad ta necesario. “Nos mester pone banda di otro e bentaha y desbentahanan di un banda reapertura y di otro banda un ciere definitivo.”. Y e mandatario kier a aclarea tambe e incertidumbre di e situacion. “ Laga nos ta hopi cla si cu esaki ainda no e caso. Por lo pronto ta trata aki di un acuerdo cu nos ta bay firma pa studia si reapertura di e refineria ta un opcion. Si ta asina anto e ora ta papia y discuti e decision final.”

ENVOLVI PARLAMENTO

Eman a manda e ora un palabra di siguransa, mustra cu e decision asina ta wordo tuma cu envolvimento di Parlamento. Den esey Eman kier tabata hopi cla. “Ta pesey mes cu nos ta bay Parlamento asina cu nos ta bek pa informa e miembronan di loke nos a papia aki. Cu nan nos ta sigui den deliberacion encuanto futuro di Aruba.”

BULULU

Henter e bululu pa loke ta e combersacionnan cu gobierno Hulandes Eman ta haya comprendibel, pero cu e lo a malinforma votadornan si ta algo cu e ta haya di mas. NOTA: Foto ta saca despues di e reunion entre delegacion di Aruba y Hulanda. Foto cortesia Nico vd Ven.