FTA a gana 2 referendum na RIU Palace awe

ORANJESTAD – Sindicato FTA a haya representacion di trahadonan di departamento di laundry y cushina di RIU Palace, despues di dos referendum cu a tuma lugar awe tardi na e edificio di MFA na Noord. Ambos departamento a haya mayoria di voto, cu ta duna e sindicato e derecho pa representa nan. Pa e departamento di laundry, tabatin 13 persona inscribi, di cual 11 a vota pro e sindicato. Di parti di e departamento di cushina, un total di 73 persona por a vota, di cual 43 a vota pro sindicato. Como tal ambos tabatin e mayoria suficiente y awor por haya representacion di e sindicato.

VEREDICTO PROME

Sindicato FTA (Federacion di Trahadonan di Aruba) por a tene referendum diaranson, pa e trahadonan di cushina y di departamento di laundry, pero no pa e departamento di housekeeping. Asina huez a dicidi den dos diferente veredicto diamars merdia. E motivacion pa e sentencia sinembargo no tabata conoci y lo bira conoci despues. Pues mediado di gobierno ta gana y perde den e caso aki.

SENTENCIA

Huez den un sentencia, a rechasa e peticion di mediado di gobierno Anselmo Pontilius pa tene referendum diaranson pa e departamento di housekeeping, y den un otro sentencia a rechasa e peticion di RIU Palace pa suspende e referendum pa cushina y laundry. E caso mes a tuma lugar siman pasa diahuebs 11 di augustus, durante cual huez enberdad a pone e fecha di diamars pa dicta un sentencia.

CASO DIALUNA

Sinembargo, dialuna RIU a bolbe hiba mediado di gobierno corte, unda cu huez a dicidi e ora pa duna RIU un chens pa dicidi pa diamars mainta, si nan ta laga FTA representa e trahadonan di henter e hotel, evitando asina multiple referendum. RIU na su turno, no tabata cla pa duna un contesta concreto y mes momento FTA (cu tambe tabata un partido den e caso) mirando e situacion a opta pa miho tene un referendum toch. Partidonan como tal no a haya otro, cu a pone cu huez mester a dicta sentencia diamars merdia. Pues esey ta nifica cu diaranson awor, tin 2 referendum, y ta keda pendiente e referendum pa trahadonan di housekeeping. Lesa e veredicto contra housekeeping aki. Y lesa e veredicto pro referendum cushina y laundry aki.